ប្រមុខចារកម្មបរទេសរបស់អាល្លឺម៉ង់ បានប្រាប់អង្គភាពព័ត៌មាន Table Mediaថា រុស្ស៊ីប្តេជ្ញាសាកល្បងការ សម្រេចចិត្តរបស់សម្ព័ន្ធភាពណាតូ រួមទាំងការពង្រីកការប្រឈមមុខដាក់គ្នាជាមួយប្រទេសលោកខាងលិច ហួសព្រំដែនអ៊ុយក្រែនទៅទៀត។ 

លោក Bruno Kahl ប្រធានផ្នែកសេវាស៊ើបការណ៍សម្ងាត់សហព័ន្ធ បាននិយាយថា ទីភ្នាក់ងាររបស់លោកមានការបង្ហាញពីព័ត៌មានចារកម្មយ៉ាងច្បាស់លាស់ ដែលមន្ត្រីរុស្ស៊ីជឿថា កាតព្វកិច្ចការពារជាតិរួមដែលមានចែងនៅក្នុងសន្ធិសញ្ញារបស់អង្គការណាតូ លែងមានកម្លាំងជាក់ស្តែងទៀតហើយ។

លោក Kahl បានថ្លែងប្រាប់សារព័ត៌មាន Table Media ក្នុងបទសម្ភាសន៍មួយថា៖«យើងប្រាកដណាស់ ហើយយើងមានព័ត៌មានសម្ងាត់ដែលបង្ហាញអំពីផែនការរបស់ប្រទេសរុស្ស៊ីដែលថា អ៊ុយក្រែនគ្រាន់តែជាជំហានមួយ ក្នុងដំណើរឆ្ពោះទៅទិសខាងលិចប៉ុណ្ណោះ»។

លោកបានបន្ថែមថា៖ «នោះមិនមានន័យថា យើងរំពឹងថា កងទ័ពរថក្រោះ នឹងវិលទៅទិសខាងលិចនោះទេ។ «ប៉ុន្តែយើងមើលឃើញថា ការសន្យាការពាររួមរបស់អង្គការណាតូ គឺត្រូវបានតេស្តសាកល្បង»។

អាល្លឺម៉ង់ ដែលជាប្រទេសផ្តល់អាវុធ និងជំនួយហិរញ្ញវត្ថុធំជាងគេទី២សម្រាប់អ៊ុយក្រែន ក្នុងសង្រ្គាមរបស់ខ្លួនជាមួយរុស្ស៊ី បានសន្យាថា នឹងបង្កើនការគាំទ្ររបស់ខ្លួនបន្ថែមទៀត ក្រោមរដ្ឋាភិបាលថ្មីរបស់អធិការបតី Friedrich Merz ដោយសន្យាថា នឹងជួយអ៊ុយក្រែនអភិវឌ្ឍន៍មីស៊ីលថ្មី ដែលអាចវាយប្រហារចូលជ្រៅទៅក្នុងទឹកដីរុស្ស៊ី។

ដោយមិនលម្អិតពីលក្ខណៈនៃប្រភពស៊ើបការណ៍សម្ងាត់របស់ខ្លួន លោក Kahl បាននិយាយថា មន្ត្រីរុស្ស៊ីកំពុងសម្លឹងមើលការប្រឈមមុខដាក់គ្នាដែលខ្វះការចូលរួមផ្នែកយោធាពេញលេញ ដែលនឹងសាកល្បងថាតើសហរដ្ឋអាមេរិកពិតជានឹងបំពេញកាតព្វកិច្ចផ្តល់ជំនួយទៅវិញទៅមក ក្រោមមាត្រា ៥ នៃសន្ធិសញ្ញាអាត្លង់ទិកខាងជើងនេះដែរយ៉ាងណា។