ក្រុមមន្ត្រីប្រចាំតំបន់ បាននិយាយនៅព្រឹកថ្ងៃអង្គារ ទី១០ មិថុនានេះ ថា រុស្ស៊ី បានបើកការវាយប្រហារដោយយានដ្រូនទ្រង់ទ្រាយធំមួយផ្សេងទៀតលើប្រទេសអ៊ុយក្រែន ដោយវាយប្រហារលើទីក្រុងគីវ និងបានបំផ្លាញអគារសម្ភពមួយកន្លែងនៅភាគខាងត្បូងទីក្រុងកំពង់ផែ Odesa ។

ការវាយប្រហារកាលពីពេលយប់ ធ្វើឡើងបន្ទាប់ពីការវាយប្រហារដោយយានដ្រូនធំបំផុតរបស់រុស្ស៊ីទៅលើអ៊ុយក្រែន កាលពីថ្ងៃចន្ទ ជាផ្នែកនៃប្រតិបត្តិការកាន់តែខ្លាំងឡើងដែលទីក្រុងមូស្គូ និយាយថា ជាវិធានការសងសឹក ចំពោះការវាយប្រហារដ៏ខ្លាំងក្លាកាលពីពេលថ្មីៗនេះរបស់ទីក្រុងគីវ ចូលទៅក្នុងប្រទេសរុស្ស៊ី។

អភិបាលក្រុង លោក Vitali Klitschko បាននិយាយនៅលើកម្មវិធីផ្ញើសារ Telegram ថាក្រុមគ្រូពេទ្យបឋម ត្រូវបានគេទូរស័ព្ទហៅទៅកាន់សង្កាត់ចំនួនបួននៅទីក្រុងគីវ នៅចន្លោះម៉ោងទៀបភ្លឺ ថ្ងៃអង្គារនេះ។ យោធាបាននិយាយថា ការវាយប្រហារនៅតែបន្ត និងបានជំរុញប្រជាជនឱ្យស្វែងរកទីជម្រកគេចពីគ្រាប់បែក។

លោក Timur Tkachenko ប្រធានរដ្ឋបាលយោធាទីក្រុងគីវ បាននិយាយនៅលើកម្មវិធីផ្ញើសារ Telegram ថា «យានដ្រូនរបស់សត្រូវ កំពុងវាយប្រហារលើសង្កាត់ជាច្រើននៅក្នុងទីក្រុង ក្នុងពេលដំណាលគ្នា បណ្តាលខូចខាតដល់អគារលំនៅឋាន និងបានបង្កអគ្គិភ័យ។

លោក Oleh Kiper អភិបាលក្រុង Odesa បាននិយាយនៅលើបណ្តាញ Telegram ថា នៅកំពង់ផែទីក្រុង Odesa ភាគខាងត្បូង ការវាយប្រហារដោយយានដ្រូនទ្រង់ទ្រាយធំ បានដាក់គោលដៅទៅលើអគារពេទ្យសង្គ្រោះបន្ទាន់ និងអគារសម្ភព ព្រមទាំងអគារលំនៅឋានពលរដ្ឋច្រើនកន្លែង។