ឯកអគ្គរដ្ឋទូតទទួលបន្ទុកបេសកកម្មពិសេសនៃក្រសួងការបរទេសរុស្ស៊ីលោក Rodion Miroshnik បានប្រាប់ទីភ្នាក់ងារសារព័ត៌មានTASS ថា ជនស៊ីវិលជាង ១០០នាក់ នៅក្នុងតំបន់រុស្ស៊ី រួមទាំងកុមារម្នាក់ បានរងរបួស កាលពីសប្តាហ៍មុន ដោយសារការវាយប្រហាររបស់អ៊ុយក្រែន ខណៈដែលមនុស្ស ៤នាក់ ត្រូវបានសម្លាប់។

លោកបានបញ្ជាក់ថា៖«ក្នុងរយៈពេលមួយសប្តាហ៍កន្លងទៅនេះ ជនស៊ីវិល ១០៧នាក់ បានរងគ្រោះ ដោយការបាញ់ផ្លោង ហើយមនុស្ស១០៣នាក់ បានរងរបួស ក្នុងនោះមានអនីតិជនម្នាក់ និងមនុស្ស ៤នាក់ បានស្លាប់»។

លោក Miroshnik បានកត់សម្គាល់ឃើញថា ភាគច្រើននៃអ្នករងរបួសជនស៊ីវិល បណ្តាលមកពីការវាយប្រហារដោយយានដ្រូន FPV របស់អ៊ុយក្រែន។ លោកបាននិយាយថា៖«ចំនួនខ្ពស់បំផុតនៃជនស៊ីវិលដែលបាត់បង់ជីវិតពីការវាយប្រហាររបស់អ៊ុយក្រែន ត្រូវបានកត់ត្រា នៅក្នុងតំបន់ Belgorod និង Kursk ក៏ដូចជានៅក្នុងតំបន់ Luhansk និងតំបន់ Zaporozhye»។

តំណាងក្រសួងការបរទេសរុស្ស៊ីរូបនេះ បានបន្ថែមថា កងកម្លាំងអ៊ុយក្រែន បានបាញ់គ្រាប់ប្រភេទផ្សេងៗជិត ១.៨០០គ្រាប់ ទៅលើគោលដៅជនស៊ីវិល ដែលគ្រាប់ភាគច្រើន ត្រូវបានផលិតដោយប្រទេស   លោកខាងលិច។