ក្រុមកុបករពាក់ម៉ាសរាប់រយនាក់បានវាយប្រហារលើកងកម្លាំងនគរបាលនិងដុតបំផ្លាញលំនៅឋាន និងរថយន្តនៅទីក្រុង Ballymena ក្នុងដែនដីអៀរឡង់ខាងជើងរបស់អង់គ្លេស ក្នុងយប់ទីពីរនៃបញ្ហាដែលត្រូវបានពិពណ៌នាថាជា "ការជំរុញឲ្យមានការរើសអើងជាតិសាសន៍" ដោយនគរបាលបន្ទាប់ពីការតវ៉ាជុំវិញការរំលោភផ្លូវភេទដែលត្រូវបានចោទប្រកាន់នៅក្នុងទីក្រុងនេះ។

នគរបាលបាននិយាយថា ពួកគេកំពុងដោះស្រាយជាមួយនឹងហ្វូងមនុស្សមិនគោរពច្បាប់ធ្ងន់ធ្ងរ កាលពីយប់ថ្ងៃអង្គារសប្ដាហ៍នេះ ក្នុងទីក្រុងដែលមានចម្ងាយប្រហែល៤៥ គីឡូម៉ែត្រពីរដ្ឋធានី Belfast ហើយបានជំរុញឱ្យប្រជាជនជៀសវាងតំបន់នោះ។

ទីភ្នាក់ងារសារព័ត៌មាន Reuters បានរាយការណ៍ថា ក្រុមមន្ត្រីប្រដាប់ដោយឧបករណ៍កុបកម្ម និងការបើកបររថពាសដែក បានឆ្លើយតបដោយកាណុងបាញ់ទឹក និងបាញ់កាំភ្លើងបាញ់គ្រាប់ជ័រ បន្ទាប់ពីត្រូវបានវាយប្រហារដោយការគប់ដបភ្លើង បំពង់ទីប និងដុំថ្ម ដែលក្រុមកុបករបានប្រមូលផ្តុំដោយការវាយកម្ទេចជញ្ជាំងអគារនៅក្បែរនោះ។ 

យោងតាមសេចក្តីរាយការណ៍បានឲ្យដឹងថា ផ្ទះមួយខ្នងត្រូវបានអគ្គិភ័យឆាបឆេះ ហើយក្រុមកុបករ ប៉ុនប៉ងដុតផ្ទះទីពីរ ខណៈរថយន្តជាច្រើនត្រូវបានដុតបំផ្លាញ។

សារព័ត៌មាន BBC បានរាយការណ៍ថា ក្រុមបាតុកររាប់រយនាក់បានប្រមូលផ្តុំគ្នានៅទីប្រជជន Ballymena ក្នុងការឆ្លើយតបទៅនឹងសំណុំរឿងពាក់ព័ន្ធនឹងក្មេងប្រុសជំទង់ពីរនាក់ ដែលបង្ហាញខ្លួននៅចំពោះមុខតុលាការកាលពីព្រឹកថ្ងៃចន្ទ ដោយពួកគេរងការចោទប្រកាន់ពីបទរំលោភសេពសន្ថវៈលើក្មេងស្រីវ័យជំទង់ម្នាក់នៅក្នុងក្រុង County Antrim៕