ការបង្រ្កាបជនអន្តោប្រវេសន៍របស់ប្រធានាធិបតីសហរដ្ឋអាមេរិក លោក Donald Trump កំពុងបង្កភាពមិនច្បាស់លាស់ ជុំវិញការប្រកួតបាល់ទាត់ពិភពលោក World Cup ឆ្នាំ២០២៦។ អ្នករៀបចំនៅក្នុងទីក្រុងនានាដែលធ្វើជាម្ចាស់ផ្ទះ បានបង្ហាញការព្រួយបារម្ភរបស់ខ្លួន។

ការប្រកួតបាល់ទាត់ពិភពលោក World Cup នឹងត្រូវប្រកួតនៅក្នុងទីក្រុងចំនួន១៦ នៅសហរដ្ឋអាមេរិក កាណាដា និងប្រទេសម៉ិកស៊ិក។ អ្នករៀបចំ បានពង្រីកការប្រកួតដល់៤៨ក្រុម និង១០៤ប្រកួត។ វាត្រូវបានគេរំពឹងថានឹងមានផលប៉ះពាល់សេដ្ឋកិច្ចចំនួន៤០ពាន់លានដុល្លារនៅក្នុងសហរដ្ឋអាមេរិកតែមួយ។

អ្នករៀបចំមួយក្រុម បាននិយាយទៅកាន់សារព័ត៌មានក្នុងទីក្រុងញូវយ៉ក ដើម្បីរៀបចំពិធីចាប់ផ្តើមការប្រកួត នៅថ្ងៃទី១១ ខែមិថុនា ឆ្នាំ២០២៦។ លោក Meg Kane នាយកប្រតិបត្តិទីក្រុងម្ចាស់ផ្ទះ Philadelphia បាននិយាយថា «ពិតជាមានរឿងដែលកំពុងកើតឡើងនៅកម្រិតថ្នាក់ជាតិ កម្រិតថ្នាក់អន្តរជាតិ នឹងមានបញ្ហាភូមិសាស្ត្រនយោបាយជាច្រើន ដែលយើងពុំដឹងនៅពេលនេះ ដែលវានឹងប៉ះពាល់ដល់ការប្រកួត»។

លោក Trump បានលើកលែងអត្តពលិក គ្រូបង្វឹក បុគ្គលិក និងសាច់ញាតិ ពីបម្រាមធ្វើដំណើរ ដែលលោកបានដាក់លើពលរដ្ឋមកពីប្រទេសចំនួន១២។ បទបញ្ជានេះ មិនបានបរិយាយអំពីអ្នកគាំទ្រការប្រកួតនោះទេ។