ប្រធានធនាគារកណ្តាលអឺរ៉ុប ECB លោកស្រី Christine Lagarde បាននិយាយនៅថ្ងៃពុធ (១១ មិថុនា) នេះថា គោលនយោបាយពាណិជ្ជកម្មបែបបង្ខិតបង្ខំ បានបរាជ័យក្នុងការដោះស្រាយអតុល្យភាពហិរញ្ញវត្ថុ ហើយហានិភ័យនៃការខូចខាតសេដ្ឋកិច្ចទៅមកគឺធំធេងខ្លាំងណាស់ ដែលគ្រប់ភាគីទាំងអស់ត្រូវថ្លឹងថ្លែងផ្ដល់សម្បទាន និងកែសម្រួលគោលនយោបាយដើម្បីដោះស្រាយភាពតានតឹង។

សហរដ្ឋអាមេរិក បានបញ្ឆេះចលាចលសេដ្ឋកិច្ចពិភពលោកក្នុងខែមេសា នៅពេលខ្លួនបានបង្ហាញរលកពន្ធលើប្រទេសភាគច្រើន ហើយលំហូរពាណិជ្ជកម្មត្រូវរំខាន ខណៈរដ្ឋាភិបាលនានាកំពុងចរចាជាមួយរដ្ឋបាលលោកប្រធានាធិបតីអាមេរិក Donald Trump។

ថ្លែងក្នុងដំណើរទស្សនកិច្ចដ៏កម្រទៅកាន់ទីក្រុងប៉េកាំង លោកស្រី Lagarde បាននិយាយថា ប្រទេសទាំងអស់ចាំបាច់ត្រូវទទួលខុសត្រូវ ធ្វើសម្បទាន ហើយគួរតែកែប្រែគោលនយោបាយដែលនាំឱ្យមានការផ្គត់ផ្គង់លើសចំណុះ ឬតម្រូវការលើស បើមិនដូច្នេះទេ របាំងពាណិជ្ជកម្ម និងការសងសឹកគ្នា នឹងបំផ្លាញវិបុលភាពពិភពលោក។

លោកស្រី Lagarde បន្តថា ចំណែករបស់អាមេរិកក្នុងតម្រូវការសកល បានកើនឡើងខ្លាំងក្នុងប៉ុន្មានឆ្នាំថ្មីៗ ដែលមួយផ្នែកឆ្លុះបញ្ចាំងពីការចំណាយលើសលប់ក្នុងវិស័យសាធារណៈ ដែលរួមចំណែកដល់អតុល្យភាពសេដ្ឋកិច្ចបែបនេះ។ លោកស្រីសង្កត់ធ្ងន់ថា ដំណោះស្រាយមួយនៅក្នុងជម្លោះ គឺស្ថិតនៅក្នុងការគោរពយ៉ាងជិតស្និទ្ធនឹងច្បាប់សកល និងការបង្កើតកិច្ចព្រមព្រៀងទ្វេភាគី ឬតំបន់ ដែលចាក់ឫសពីផលប្រយោជន៍ទៅវិញទៅមក៕