ហ្វូងមនុស្សរាប់រយនាក់បានប្រមូលផ្តុំគ្នានៅតាមដងផ្លូវនៃទីប្រជុំជន Ballymena ក្នុងដែនដីអៀរឡង់ខាងជើង របស់ចក្រភពអង់គ្លេស កាលពីថ្ងៃពុធ (១១ មិថុនា) ដោយប្រឈមមុខយ៉ាងក្ដៅគគុកទល់នឹងនគរបាលបំពាក់ដោយខែលកុបកម្ម និងកាណុងបាញ់ទឹក នៅយប់ទីបីនៃបាតុកម្មប្រឆាំងជនអន្តោប្រវេសន៍ដ៏កម្រោល។

ក្រុមកុបកម្មបានវាយប្រហារនគរបាល និងដុតភ្លើងនៅតាមដងផ្លូវនានាក្នុងថ្ងៃទីបីនៃហិង្សា ខណៈកាលពីបាតុកម្មពីរយប់មុនបានមើលឃើញផ្ទះសម្បែង និងអាជីវកម្មត្រូវបានដុតបំផ្លាញរួចមកហើយ ហើយមន្ត្រីនគរបាលរាប់សិបនាក់រងរបួស។ ការតវ៉ានោះផ្ទុះឡើងក្នុងទីប្រជុំជនភាគខាងជើង បន្ទាប់ពីការចាប់ខ្លួនក្មេងជំទង់ពីរនាក់ ដែលត្រូវចោទប្រកាន់ពីបទប៉ុនប៉ងរំលោភក្មេងស្រីជំទង់ម្នាក់។ ជនត្រូវចោទទាំងនោះបានបង្ហាញខ្លួនកាលពីថ្ងៃចន្ទនៅតុលាការ ហើយពួកគេបានស្នើសុំអ្នកបកប្រែជាភាសារ៉ូម៉ានី។

នគរបាលមិនបានបញ្ជាក់ពីជនជាតិនៃក្មេងជំទង់ដែលនៅតែស្ថិតក្នុងការឃុំឃាំងទាំងនោះទេ ប៉ុន្តែតំបន់ដែលត្រូវបានវាយប្រហារកាលថ្ងៃចន្ទ និងថ្ងៃអង្គារ រួមមានសង្កាត់ដែលជនអន្តោប្រវេសន៍រ៉ូម៉ានីរស់នៅ។ មន្ត្រីជាន់ខ្ពស់មកពីគ្រប់គណបក្សនៅដែនដីនេះបានថ្កោលទោសយ៉ាងខ្លាំងចំពោះ "អំពើហិង្សារើសអើងជាតិសាសន៍ ដែលបានមើលឃើញក្នុងប៉ុន្មានថ្ងៃថ្មីៗ"។

មន្រ្តីទាំងនោះបាននិយាយក្នុងសេចក្តីថ្លែងការណ៍រួមមួយកាលថ្ងៃពុធថា អ្នកស្រុកបានទទួលរង "អំពើភេរវនិយម" ហើយនគរបាលបានរងរបួស ដោយជំរុញឱ្យប្រជាជនបដិសេធរបៀបវារៈ "ដ៏បែកបាក់" ដែលត្រូវជំរុញដោយពួក "បំផ្លិចបំផ្លាញ"។ ជាការឆ្លើយតបទៅនឹងអ្វីដែលគេឱ្យឈ្មោះថា "ការរើសអើងជាតិសាសន៍ដ៏ហិង្សា" នគរបាលបានដាក់ពង្រាយមន្ត្រីកុបកម្មជាមួយសត្វសុខន ហើយបានស្នើកងកម្លាំងបន្ថែមពីដែនដីអង់គ្លេស និងវេលស៍ ឱ្យជួយលុបបំបាត់ភាពចលាចលនេះ៕