ភ្នំពេញ៖ សភាសម្ព័ន្ធសហជីពជាតិកម្ពុជា រយៈពេល ១៤ឆ្នាំមកនូវនៅតែបន្តកិច្ចការស្នូលរបស់ខ្លួន។ កិច្ចការស្នូលនេះ គឺសំដៅលើការចូលរួមជាមួយក្រសួងការងារ ក៏ដូចជារាជរដ្ឋាភិបាលកម្ពុជា ដើម្បីការពារសិទ្ធិផលប្រយោជន៍ស្របច្បាប់ជូនកម្មករកម្មការិនី។ នេះជាការលើកឡើងរបស់ ប្រធានសភាសម្ព័ន្ធសហជីពជាតិកម្ពុជា ក្នុងឱកាសអបអរសាទរ ខួប ១៤ឆ្នាំ នៃការបង្កើត។
សភាសម្ព័ន្ធសហជីពជាតិកម្ពុជា បានចាប់កំណើតកាលពីឆ្នាំ ២០១៧ កន្លងទៅ ដោយមានសមាជិក ជាង៥ម៉ឺននាក់ ហើយរីកដុះដាលរហូតដល់ជាង ៥០ម៉ឺននាក់គិតត្រឹមពេលបច្ចុប្បន្ន។ នេះជាការលើកឡើងរបស់ លោក សួង ហួត ប្រធានសភាសម្ព័ន្ធសហជីពជាតិកម្ពុជា។
លោកបញ្ជាក់ថា រយៈពេល ១៤ឆ្នាំមកនេះ សភាសម្ព័ន្ធសហជីពជាតិកម្ពុជា គឺនៅតែបន្តកិច្ចការស្នូលរបស់ខ្លួន ដើម្បីការពារសិទ្ធិផលប្រយោជន៍ស្របច្បាប់ជូនកម្មករ និងលើកតម្កើងកម្រិតជីវភាពកម្មករឱ្យមានភាពប្រសើរ។ លើសពីនេះ សភាសម្ព័ន្ធសហជីពជាតិកម្ពុជា ជាការរួមគ្នាជាធ្លុងមួយ ក្នុងការកែលម្អលក្ខខណ្ឌការងារ លើកកម្ពស់សុខុមាលភាពកម្មករ ក៏ដូចជាពង្រឹងទំនាក់ទំនងល្អជាមួយអាជ្ញាធរ និងរាជរដ្ឋាភិបាលកម្ពុជា។
ពាក់ព័ន្ធនឹងវត្តមាន របស់ សភាសម្ព័ន្ធសហជីពជាតិកម្ពុជា ឯកឧត្តម សោម អូន រដ្ឋលេខាធិការក្រសួងការងារ តំណាងឯកឧត្ដម រដ្ឋមន្ត្រី ក៏បានកោតសសើរចំពោះកិច្ចការកន្លងមក របស់សភាសម្ព័ន្ធសហជីពជាតិកម្ពុជា ដែលបានចូលរួមយ៉ាងសកម្មក្នុងការផ្សព្វផ្សាយ អប់រំ អនុវត្តច្បាប់ និងបទដ្ឋានគតិយុទ្ធផ្សេងៗ ដែលជាការរួមចំណែកការពារសិទ្ធិ និងផលប្រយោជន៍ស្របច្បាប់របស់កម្មករនិយោជិត។
ឯកឧត្តមក្នុងនាមតំណាងឱ្យក្រសួងការងារ ក៏ផ្ដល់ជាអនុសាសន៍ជូនដល់ សភាសម្ព័ន្ធសហជីពជាតិកម្ពុជា ត្រូវបន្តអនុវត្តសកម្មភាពឱ្យបានត្រឹមត្រូវ ស្របតាមច្បាប់ស្ដីពីការងារ ច្បាប់ស្ដីពីសហជីព លក្ខន្តិកៈសហជីព និងត្រូវបន្តជាដៃគូជាមួយក្រសួងការងារ ដើម្បីរួមចំណែកថែរក្សាសុខសន្តិភាព សណ្ដាប់ធ្នាប់សាធារណៈ បរិយាកាសវិនិយោគ និងបន្តអប់រំផ្សព្វផ្សាយ ទប់ស្កាត់ការរីករាលដាលកូវីដ-១៩នៅកន្លែងការងារ៕ អត្ថបទ៖ គឹមហុក
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
