ក្រុមមន្ត្រីបាននិយាយកាលពីថ្ងៃពុធ (១១ មិថុនា) ថា កងម៉ារីនរបស់សហរដ្ឋអាមេរិក នឹងចូលរួមជាមួយកងទ័ពឆ្មាំជាតិនៅតាមដងផ្លូវនៃទីក្រុង Los Angeles ក្នុងរយៈពេលពីរថ្ងៃខាងមុខនេះ ហើយអាជ្ញាធរនឹងត្រូវបានអនុញ្ញាតឱ្យឃុំខ្លួនជនណាម្នាក់ ដែលជ្រៀតជ្រែកជាមួយមន្ត្រីអន្តោប្រវេសន៍លើការឆ្មក់បង្រ្កាប ឬអ្នកតវ៉ា ដែលប្រឈមមុខនឹងភ្នាក់ងារសហព័ន្ធ។

យោធាអាមេរិក បាននិយាយនៅថ្ងៃពុធថា កងវរសេនាតូចនៃកងម៉ារីនចំនួន ៧០០នាក់ បានបញ្ចប់ការហ្វឹកហ្វឺនជាក់លាក់ចំពោះបេសកកម្ម LA រួមទាំងការបន្ថយភាពតានតឹង និងការគ្រប់គ្រងហ្វូងមនុស្ស ហើយកងម៉ារីននេះនឹងចូលរួមជាមួយឆ្មាំជាតិក្រោមអំណាចនៃច្បាប់សហព័ន្ធ ក្នុងពេល ៤៨ម៉ោងបន្ទាប់ មិនមែនដើម្បីគ្រប់គ្រងជនស៊ីវិលទេ ប៉ុន្តែដើម្បីការពារមន្រ្តីសហព័ន្ធ និងទ្រព្យសម្បត្តិ។

ប្រធានាធិបតីអាមេរិក លោក Donald Trump បានបញ្ជាឱ្យមានការដាក់ពង្រាយបែបនេះ ជុំវិញការជំទាស់របស់អភិបាលរដ្ឋ California លោក Gavin Newsom ដែលបង្កឱ្យមានការជជែកដេញដោលថ្នាក់ជាតិអំពីការប្រើប្រាស់យោធាលើទឹកដីសហរដ្ឋអាមេរិក និងការតវ៉ាដ៏តានតឹង ដែលបានរីករាលដាលហួសពីទីក្រុង Los Angeles ទៅកាន់ទីក្រុងធំៗផ្សេងទៀត។

លោក Trump បាននិយាយក្នុងព្រឹត្តិការណ៍មួយនៅឯមហោស្រព Kennedy ថា "ប្រសិនបើលោកមិនធ្វើសកម្មភាពភ្លាមៗលើរឿងនេះទេ នោះទីក្រុង Los Angeles នឹងឆេះខ្ទេចខ្ទីគ្មានសល់អ្វីទេនៅពេលនេះ"។ មេដឹកនាំរដ្ឋ និងតំបន់ជំទាស់ថា លោក Trump បានបង្កើនភាពតានតឹងជាមួយនឹងការដាក់ពង្រាយកងទ័ពសហព័ន្ធដែលមិនចាំបាច់ និងខុសច្បាប់ ខណៈសមាជិកបក្សប្រជាធិបតេយ្យទូទាំងប្រទេស បានថ្កោលទោសសកម្មភាពរបស់លោកជាអំពើផ្តាច់ការ៕