ទីស្តីការគណៈរដ្ឋមន្ត្រីរបស់ប្រទេសម៉ាលីកាលពីថ្ងៃពុធ បានអនុម័តច្បាប់ដ៏ចម្រូងចម្រាសមួយ ដែលផ្តល់អំណាចដល់ប្រមុខរបបយោធារយៈពេល ៥ឆ្នាំ បន្ថែមទៀត។

លោកឧត្តមសេនីយ៍ Assimi Goita បានដឹកនាំប្រទេសអាហ្រ្វិកខាងលិច ចាប់តាំងពីធ្វើរដ្ឋប្រហារចំនួនពីរក្នុងឆ្នាំ ២០២០ និង ២០២១។ ការសម្រេចនេះ ធ្វើឡើង បន្ទាប់ពីការរំលាយគណបក្សនយោបាយរបស់របបយោធា កាលពីខែឧសភា។

យោងតាមសេចក្តីថ្លែងការណ៍របស់គណៈរដ្ឋមន្ត្រីនៃរដ្ឋាភិបាលនេះ ច្បាប់នេះនឹងនាំទៅដល់«ការកែសម្រួលធម្មនុញ្ញអន្តរកាល ដោយផ្តល់សិទ្ធិដល់ប្រមុខរដ្ឋនូវអាណត្តិបន្តរយៈពេល ៥ឆ្នាំ ដែលចាប់ផ្តើមនៅឆ្នាំ ២០២៥»។ ច្បាប់នេះដែរ អនុវត្តអនុសាសន៍នៃការពិគ្រោះយោបល់ការសន្ទនាថ្នាក់ជាតិ ដែលរៀបចំដោយរបបយោធាកាលពីខែមេសា ដែលគណបក្សនយោបាយជាច្រើន បានធ្វើពហិការ។

ឥឡូវនេះ ច្បាប់នេះកំពុងរង់ចាំការផ្តល់សច្ចាប័នដោយក្រុមប្រឹក្សាអន្តរកាលជាតិ ដែលជាស្ថាប័ននីតិប្បញ្ញត្តិដែលត្រួតពិនិត្យការផ្លាស់ប្តូរនេះ។

កាលពីដើមខែឧសភា លោកឧត្តមសេនីយ៍ Goita បានចុះហត្ថលេខាលើក្រឹត្យរំលាយគណបក្សនយោបាយ ដែលជាការសម្រេចមួយ ធ្វើឡើង ក្នុងបរិបទនៃការប្រឆាំងដែលកំពុងកើនឡើង។ ការរំលាយគណបក្សនេះ កើតឡើង ស្របពេលជាមួយនឹងការកើនឡើងនៃការចាប់ជំរិតសកម្មជនគាំទ្រលទ្ធិប្រជាធិបតេយ្យ នៅក្នុងរដ្ឋធានី Bamako ហើយរយៈពេលប៉ុន្មានថ្ងៃ បន្ទាប់ពីការធ្វើបាតុកម្មមួយ ដែលបានធ្វើឡើងដោយសកម្មជនរាប់រយនាក់។