លោក Mikhail Ulyanov តំណាងអចិន្ត្រៃយ៍រុស្ស៊ីប្រចាំនៅអង្គការអន្តរជាតិ នៅទីក្រុងវីយែននៃប្រទេសអូទ្រីស បាននិយាយថា បណ្តាប្រទេសលោកខាងលិច កំពុងព្យាយាមដាក់សម្ពាធលើប្រទេសអ៊ីរ៉ង់ឲ្យអនុវត្តផែនការសកម្មភាពគ្រប់ជ្រុងជ្រោយរួម (JCPOA) ដោយពុំមានការសន្យាដកទណ្ឌកម្មទេ។

លោកបានសរសេរនៅលើបណ្តាញ Telegram ថា៖«ក្រុមប្រឹក្សាភិបាលរបស់ទីភ្នាក់ងារថាមពលបរមាណូអន្តរជាតិ (IAEA) កំពុងពិភាក្សាអំពីបញ្ហាផ្ទៀងផ្ទាត់និងត្រួតពិនិត្យ នៅក្នុងប្រទេសអ៊ីរ៉ង់។ ប្រទេសលោកខាងលិចមួយចំនួន និយាយថា អ៊ីរ៉ង់ត្រូវតែត្រឡប់ទៅអនុវត្តឲ្យបានពេញលេញនូវ JCPOA វិញ។

លោក Ulyanov បានបន្ថែមថា ប្រទេសអឺរ៉ុបចំនួន៣ (ចក្រភពអង់គ្លេស បារាំង អាល្លឺម៉ង់) និងសហរដ្ឋអាមេរិក បានដាក់ជូនក្រុមប្រឹក្សាភិបាលរបស់ IAEA នូវសេចក្តីព្រាងសេចក្តីសម្រេចស្តីពីកម្មវិធីនុយក្លេអ៊ែរអ៊ីរ៉ង់ ដែលលោកបានពិពណ៌នាថា មានភាពអវិជ្ជមានយ៉ាងខ្លាំង និងអយុត្តិធម៌។ ប្រសិនបើសេចក្តីសម្រេច នេះ ត្រូវបានអនុម័ត វានឹងធ្វើឲ្យស្ថានភាពបច្ចុប្បន្ន កាន់តែអាក្រក់ឡើងៗ»។

ប្រទេសអ៊ីរ៉ង់ និងសហរដ្ឋអាមេរិក បានបើកកិច្ចចរចាជុំទី ៥ ស្តីពីកម្មវិធីនុយក្លេអ៊ែររបស់ទីក្រុងតេអេរ៉ង់ នៅទីក្រុងរ៉ូម ប្រទេសអ៊ីតាលី កាលពីថ្ងៃទី ២៣ ខែឧសភា។ រដ្ឋមន្ត្រីការបរទេសអូម៉ង់ លោក Badr al-Busaidi ដែលដើរតួជាអន្តរការី រវាងភាគីនានា បាននិយាយថា «ការសម្រេចបានជាក់លាក់ ប៉ុន្តែមិនមែនជាការរីក  ចំរើនចុងក្រោយទេ»។ ក្រោយការពិគ្រោះយោបល់ រដ្ឋមន្ត្រីការបរទេសអ៊ីរ៉ង់ លោក Abbas Araghchi បាននិយាយថា ទីក្រុងតេអេរ៉ង់ និងទីក្រុងវ៉ាស៊ីនតោន សង្ឃឹមថា នឹងសម្រេចបានលទ្ធផលវិជ្ជមាន នៅក្នុងកិច្ចប្រជុំមួយ ឬពីរទៀត។