ប្រធានាធិបតីអ៊ុយក្រែនលោក Volodymyr Zelensky កាលពីថ្ងៃពុធ (ទី១១ ខែមិថុនា) បាននិយាយថា រុស្ស៊ីបានប្តេជ្ញាចិត្តបង្កើតភាពវឹកវរ ផ្នែកខាងក្នុង និងបំផ្លាញភាគខាងត្បូងនៃប្រទេសរបស់លោក ក៏ដូចជានៅជិតប្រទេសម៉ុលដាវី និងរ៉ូម៉ានី ហើយបានអំពាវនាវឲ្យបង្កើនសម្ពាធលើទីក្រុងមូស្គូ ដើម្បីទប់ស្កាត់ការគំរាមកំហែងផ្នែកយោធាបន្ថែមទៀត។

អំឡុងពេលថ្លែងសុន្ទរកថាក្នុងសន្និសីទនៃមេដឹកនាំអឺរ៉ុបភាគអាគ្នេយ៍ នៅកំពង់ផែសមុទ្រខ្មៅនៃទីក្រុង Odesa លោក Zelensky បាននិយាយថា កិច្ចខិតខំប្រឹងប្រែងរួម គឺត្រូវការជាចាំបាច់ ដើម្បីទប់ទីក្រុងមូស្គូកុំឲ្យបង្កការរំខានបន្ថែមទៀត។ លោក Zelensky បានលើកឡើងនៅលើកម្មវិធីផ្ញើសារ Telegram ថា៖ «សន្តិសុខនៃទ្វីបអឺរ៉ុបភាគអាគ្នេយ៍ និងសមុទ្រខ្មៅ គឺមិនអាចផ្ដាច់ចេញពីគ្នាបានឡើយ។ សព្វថ្ងៃនេះ យើងត្រូវបានគេបង្ខំឲ្យប្រយុទ្ធ មិនមែនត្រឹមតែដើម្បីប្រទេសរបស់យើងប៉ុណ្ណោះទេ ប៉ុន្តែថែមទាំងដើម្បីឲ្យការពិតនេះក្លាយជាមូលដ្ឋានគ្រឹះនៃគោលនយោបាយក្នុងតំបន់ថ្មីមួយ»។

លោកបានបន្ថែមថា៖ «យើងនៅទីនេះ ក្នុងក្រុង Odesa ជាទីក្រុងដែលរុស្ស៊ីចង់បំផ្លាញ ព្រោះប្រទេសនេះបានបំផ្លាញទីក្រុងផ្សេងៗទៀតរាប់មិនអស់។ ផែនការយោធារបស់រុស្ស៊ី គឺផ្តោតលើតំបន់នេះ ហើយបន្ទាប់មកនៅព្រំដែនជាមួយប្រទេសម៉ុលដាវី និងរ៉ូម៉ានី។ យើងត្រូវការពារឥឡូវនេះ។ ប៉ុន្តែលើសពីនេះទៀត យើងត្រូវការការធានារយៈពេលវែងថា រឿងនេះនឹងមិនកើតឡើងម្តងទៀតឡើយ»។

គួរបញ្ជាក់ថា ទីក្រុង Odesa ដែលជាទីតាំងនៃកំពង់ផែចំនួន៣ គឺជាគោលដៅញឹកញាប់នៃការវាយប្រហារតាមអាកាសរបស់រុស្ស៊ី ក្នុងសង្គ្រាមដែលមានរយៈពេល ៣ឆ្នាំ។ ទីក្រុងនេះបានស្ថិតក្រោមការវាយប្រហារដោយយានដ្រូនទ្រង់ទ្រាយធំ កាលពីថ្ងៃទី៩ ខែមិថុនា ដែលដាក់គោលដៅលើអគារពេទ្យសង្គ្រោះបន្ទាន់ បន្ទប់សម្ភព និងអគារលំនៅឋាន៕