ប្រទេសអូស្ត្រាលី បាននិយាយនៅថ្ងៃព្រហស្បតិ៍នេះថា ខ្លួនមានទំនុកចិត្តយ៉ាងខ្លាំងចំពោះអនាគតនៃកិច្ចព្រមព្រៀងរបស់សហរដ្ឋអាមេរិក ក្នុងការបំពាក់កងនាវាចរណ៍របស់ខ្លួន ជាមួយនឹងកងនាវានៃនាវាមុជទឹកដើរដោយថាមពលនុយក្លេអ៊ែរ បន្ទាប់ពីរដ្ឋបាលរបស់លោក ដូណាល់ ត្រាំ បានត្រួតពិនិត្យកិច្ចព្រមព្រៀង ឡើងវិញ។

កិច្ចព្រមព្រៀង AUKUS ឆ្នាំ ២០២១ ចូលរួមជាមួយប្រទេសអូស្ត្រាលី ចក្រភពអង់គ្លេស និងសហរដ្ឋអាមេរិក ក្នុងកិច្ចខិតខំប្រឹងប្រែងជាច្រើនទសវត្សរ៍ ដើម្បីធ្វើឲ្យមានតុល្យភាពជាមួយនឹងកម្លាំងយោធាដែលកំពុងកើនឡើងរបស់ប្រទេសចិន។

កិច្ចព្រមព្រៀងនេះ មានគោលបំណងផ្តល់អាវុធដល់ប្រទេសអូស្ត្រាលី ជាមួយនឹងកងនាវានៃនាវាមុជទឹកដើរដោយថាមពលនុយក្លេអ៊ែរដ៏ទំនើបពីសហរដ្ឋអាមេរិក និងផ្តល់កិច្ចសហប្រតិបត្តិការ ក្នុងការអភិវឌ្ឍបច្ចេកវិទ្យាសង្គ្រាមជាច្រើនប្រភេទ។

អ្នកនាំពាក្យក្រសួងការពារជាតិអូស្ត្រាលី បានបញ្ជាក់នៅថ្ងៃព្រហស្បតិ៍នេះថា រដ្ឋបាលរបស់ប្រធានាធិបតីអាមេរិក លោក ដូណាល់ ត្រាំ បានណែនាំអូស្ត្រាលី និងចក្រភពអង់គ្លេសថា ខ្លួនកំពុងពិនិត្យមើលកិច្ចព្រមព្រៀង AUKUSឡើងវិញ។  

រដ្ឋមន្ត្រីការពារជាតិ Richard Marles បាននិយាយថា លោកមានទំនុកចិត្តយ៉ាងខ្លាំងថា អូស្ត្រាលីនឹងនៅតែទទួលបាននាវាមុជទឹកពីអាមេរិក។

លោកបានប្រាប់ទូរទស្សន៍ ABC ថា៖«ខ្ញុំគិតថា ការពិនិត្យឡើងវិញដែលត្រូវបានប្រកាស មិនមែនជារឿងគួរឲ្យភ្ញាក់ផ្អើលទេ»។