តម្លៃប្រេងបានហក់ឡើងច្រើនជាង ៧% នៅថ្ងៃសុក្រ (១៣ មិថុនា) នេះ ដោយឡើងដល់កម្រិតខ្ពស់បំផុតក្នុងរយៈពេលប៉ុន្មានខែរបស់ខ្លួន បន្ទាប់ពីអ៊ីស្រាអែល បាននិយាយថា ខ្លួនបើកការវាយប្រហារលើអ៊ីរ៉ង់ ដោយបង្កើនភាពតានតឹងយ៉ាងខ្លាំងនៅមជ្ឈិមបូព៌ា និងធ្វើឱ្យវិនិយោគិន ព្រួយបារម្ភអំពីផលរំខានការផ្គត់ផ្គង់ប្រេង។

សន្ទស្សន៍ប្រេងឆៅ Brent បានឡើង ៥,២៩ដុល្លារ ឬ ៧,៦៣% ដល់អត្រា ៧៤,៦៥ដុល្លារក្នុងមួយបារ៉ែល ត្រឹមម៉ោងសកល ០១:៤២រំលងអាធ្រាត្រឈានចូលថ្ងៃសុក្រ បន្ទាប់ពីឡើងដល់កម្រិតខ្ពស់រួចទៅហើយនៅថ្ងៃព្រហស្បតិ៍ក្នុងតម្លៃ ៧៥,៣២ដុល្លារ ដែលជាតម្លៃខ្ពស់បំផុតចាប់តាំងពីថ្ងៃទី០២ ខែមេសា។ ចំណែកប្រេងឆៅ WTI របស់អាមេរិក បានកើនឡើង ៥,៣៨ដុល្លារ ឬ ៧,៩១% នៅតម្លៃ ៧៣,៤២ដុល្លារក្នុងមួយបារ៉ែល បន្ទាប់ពីឡើងដល់កម្រិតខ្ពស់ ៧៤,៣៥ដុល្លារ ដែលជាតម្លៃខ្ពស់បំផុតចាប់តាំងពីថ្ងៃទី០៣ ខែកុម្ភៈ មក។

អ៊ីស្រាអែលនិយាយនៅព្រឹកថ្ងៃសុក្រថា ខ្លួនវាយប្រហារអ៊ីរ៉ង់ ហើយប្រព័ន្ធផ្សព្វផ្សាយអ៊ីរ៉ង់ និយាយថា ការផ្ទុះជាច្រើនត្រូវលាន់ឮក្នុងទីក្រុងតេអេរ៉ង់ ខណៈភាពតានតឹងកើនឡើង ជុំវិញកិច្ចខិតខំប្រឹងប្រែងរបស់អាមេរិក ដើម្បីយកឈ្នះកិច្ចព្រមព្រៀងរបស់អ៊ីរ៉ង់ ក្នុងការបញ្ឈប់ការផលិតគ្រាប់បែកនុយក្លេអ៊ែរ។

នៅក្នុងទីផ្សារផ្សេងទៀត ភាគហ៊ុនបានធ្លាក់ចុះក្នុងការជួញដូរដំបូងនៅអាស៊ី ដែលដឹកនាំដោយការសម្រុកលក់ចេញនូវភាគហ៊ុនអាមេរិក ខណៈវិនិយោគិនទន្ទឹងរង់ចាំសន្ទស្សន៍សុវត្ថិភាព ដូចជាមាស និងរូបិយបណ្ណហ្វ្រង់ស្វីសជាដើម។ អ្នកវិភាគទីផ្សារ IG លោក Tony Sycamore និយាយថា កំណើនភាពតានតឹងគួរឱ្យបារម្ភនេះ ជះផលប៉ះពាល់ដល់អារម្មណ៍យ៉ាងប្រថុយប្រថានក្នុងទីផ្សារហិរញ្ញវត្ថុ៕