ការវាយប្រហាររបស់អ៊ីស្រាអែល នៅថ្ងៃសុក្រ (១៣ មិថុនា) នេះលើអ៊ីរ៉ង់ បានក្លាយជាការបង្កើនជម្លោះចុងក្រោយបំផុត ចាប់តាំងពីសង្រ្គាមហ្កាហ្សា ឆ្នាំ២០២៣ និងបង្កើនការភ័យខ្លាចនៃសង្រ្គាមពេញទំហឹងរវាងប្រទេសទាំងពីរ ដែលជាសត្រូវប្រវត្តិសាស្រ្ត ហើយតែងមានជម្លោះសម្ងាត់ជាច្រើនទស្សវត្សរ៍មកហើយ រួមមានការវាយប្រហារតាមផ្លូវគោក សមុទ្រ អាកាស និងអ៊ីនធឺណិត។

ឆ្នាំ១៩៧៩ - មេដឹកនាំគាំទ្រលោកខាងលិចរបស់អ៊ីរ៉ង់ ឈ្មោះ Mohammed Reza Shah ដែលបានចាត់ទុកអ៊ីស្រាអែលថាជាសម្ព័ន្ធមិត្ត ត្រូវបានទម្លាក់ចេញពីអំណាចក្នុងបដិវត្តន៍អ៊ិស្លាមដ៏ធំ ដែលដំឡើងរបបនិកាយស៊ីអ៊ីតថ្មីមួយ ដែលចាត់ទុកថា ការប្រឆាំងនឹងអ៊ីស្រាអែលជាភាពចាំបាច់ខាងមនោគមវិជ្ជា។

ឆ្នាំ១៩៨២ - នៅពេលអ៊ីស្រាអែលឈ្លានពានលីបង់ ឆ្មាំបដិវត្តន៍របស់អ៊ីរ៉ង់ ធ្វើការជាមួយអ្នកកាន់សាសនាអ៊ិស្លាមស៊ីអ៊ីតនៅទីនោះដើម្បីបង្កើតក្រុមហេសបូឡា។ នៅទីបំផុតអ៊ីស្រាអែល មើលឃើញក្រុមនេះថាជាសត្រូវដ៏គ្រោះថ្នាក់តាមព្រំដែនខ្លួន។

សង្រ្គាមស្រមោលទាំងនោះបន្តអស់ជាច្រើនឆ្នាំចូលដល់អំឡុងឆ្នាំ២០០០ ហើយជម្លោះដោយផ្ទាល់ថ្មីបំផុតមួយគឺកាលខែមេសា ឆ្នាំ២០២៤ នៅពេលការវាយប្រហារតាមអាកាសដែលសង្ស័យថាជារបស់អ៊ីស្រាអែល ត្រូវចំបរិវេណស្ថានទូតអ៊ីរ៉ង់ ក្នុងក្រុងដាម៉ាស សម្លាប់មន្ត្រីឆ្មាំបដិវត្តន៍ ៧នាក់។ អ៊ីស្រាអែល មិនបញ្ជាក់ ឬក៏បដិសេធការទទួលខុសត្រូវឡើយ។ អ៊ីរ៉ង់ឆ្លើយតបជាមួយនឹងរលកយានដ្រូន និងមីស៊ីល នៅក្នុងការវាយប្រហារដោយផ្ទាល់មិនធ្លាប់មាន លើទឹកដីអ៊ីស្រាអែល កាលថ្ងៃ១៣ មេសា។ នេះបានជំរុញឱ្យអ៊ីស្រាអែល វាយប្រហារលើទឹកដីអ៊ីរ៉ង់ នៅថ្ងៃទី១៩ ខែមេសា យោងតាមប្រភព។

ខែតុលា ឆ្នាំ២០២៤- អ៊ីរ៉ង់បានបាញ់មីស៊ីលជាង ១៨០គ្រាប់ទៅកាន់អ៊ីស្រាអែល ក្នុងអ្វីដែលខ្លួនហៅការសងសឹកចំពោះការសម្លាប់មេដឹកនាំហេសបូឡា និងប្រធានក្រុមហាម៉ាស។ អ៊ីស្រាអែល វាយទីតាំងយោធានៅអ៊ីរ៉ង់ កាលពីចុងខែឆ្នាំដដែលនោះ ដោយនិយាយថានោះជាការសងសឹកវិញ។

ខែមិថុនា ឆ្នាំ២០២៥នេះ- អ៊ីស្រាអែល វាយប្រហារអ៊ីរ៉ង់ ដែលខ្លួននិយាយថាមានបំណងរំខានដល់ហេដ្ឋារចនាសម្ព័ន្ធនុយក្លេអ៊ែររបស់សាធារណរដ្ឋអ៊ិស្លាមមួយនេះ និងកំណត់គោលដៅលើអ្នកវិទ្យាសាស្ត្រដែលកំពុងធ្វើការលើគ្រាប់បែកនុយក្លេអ៊ែរ នៅក្នុងប្រតិបត្តិការដែលនឹងបន្តជាច្រើនថ្ងៃទៀត៕