មន្ត្រីជាន់ខ្ពស់របស់អង្គការសហប្រជាជាតិកាលពីថ្ងៃពុធ បានព្រមានក្រុមប្រឹក្សាសន្តិសុខថា មានហានិភ័យដែលស្ថានភាពផុយស្រួយ ក្នុងប្រទេសយេម៉ែន អាចកាន់តែអាក្រក់ឡើងយ៉ាងឆាប់រហ័ស ខណៈដែលពួកគេបានអំពាវនាវឲ្យមានការខិតខំប្រឹងប្រែងការទូតកាន់តែខ្លាំង និងបង្កើនមូលនិធិមនុស្សធម៌ ដើម្បីទប់ស្កាត់អស្ថិរភាពបន្ថែមទៀត និងបន្ធូរបន្ថយការឈឺចាប់របស់ប្រជាជន។

ដោយសេដ្ឋកិច្ចរបស់ប្រទេសយេម៉ែន កំពុងធ្លាក់ចុះធ្ងន់ធ្ងរពេក និងមនុស្សរាប់លាននាក់ កំពុងខ្វះខាត ពួកគេបាននិយាយថា ពុំមានពេលវេលា ដើម្បីប្រែក្លាយ«ក្តីសង្ឃឹមឲ្យក្លាយជាវឌ្ឍនភាពបានទេ»។

បេសកជនពិសេសរបស់អង្គការសហប្រជាជាតិទទួលបន្ទុកកិច្ចការប្រទេសយេម៉ែន លោក Hans Grundberg និងអ្នកសម្របសម្រួលរងជំនួយសង្គ្រោះបន្ទាន់ លោក Joyce Msuya ក៏បានគូសបញ្ជាក់ពីការបន្តឃុំខ្លួនបុគ្គលិកនិងនិយោជិតនៃអង្គការមិនមែនរដ្ឋាភិបាលរបស់UN ដោយក្រុមហ៊ួទី រយៈពេលមួយឆ្នាំបន្ទាប់ពីរាប់សិបនាក់ ត្រូវបានចាប់ខ្លួនតាមអំពើចិត្ត។

លោក Grundberg បាននិយាយថា៖«ការបន្តពន្ធនាគាររបស់ពួកគេ គឺពិតជាគួរឲ្យអាម៉ាស់។ «ខ្ញុំសូមអំពាវនាវជាថ្មីម្តងទៀត ក្នុងលក្ខខណ្ឌចាំបាច់បំផុត ដើម្បីឲ្យដោះលែងពួកគេជាបន្ទាន់ និងដោយគ្មានលក្ខ        ខណ្ឌ។

លោក Msuya បានធ្វើការថ្កោលទោសជាថ្មី ដោយនិយាយថា៖«បុគ្គលិក ២៣នាក់របស់អង្គការសហប្រជាជាតិ នៅតែត្រូវជាប់ឃុំ។ ខ្ញុំចូលរួមជាមួយបេសកជនពិសេសនិងអគ្គលេខាធិការអង្គការសហប្រជាជាតិ ក្នុងការអំពាវនាវឲ្យមានការដោះលែងពួកគេជាបន្ទាន់»។