អ៊ីស្រាអែល និងអ៊ីរ៉ង់ បានបើកការវាយប្រហាររលកថ្មីលើទីក្រុងសំខាន់ៗ ធ្វើឲ្យមានក្តីបារម្ភដល់សង្រ្គាមពេញបន្ទុក ស្របពេលដែលការប៉ះទង្គិចគ្នានេះ ឈានចូលដល់ថ្ងៃទី ៣ ។

សារព័ត៌មានអ៊ីស្រាអែល រាយការណ៍ថា ការវាយប្រហារមីស៊ីលរបស់អ៊ីរ៉ង់លើតំបន់ភាគខាងជើងអ៊ីស្រាអែល បានសម្លាប់មនុស្សយ៉ាងហោច ៣នាក់ និងមនុស្ស ១៣នាក់ផ្សេងទៀត រងរបួស កាលពីយប់រំលងអធ្រាត្រថ្ងៃសៅរ៍ ឈានចូលដល់ព្រឹកថ្ងៃអាទិត្យ ។

យោងតាមសេចក្តីរាយការណ៍របស់ទីភ្នាក់ងារព័ត៌មានពាក់កកណ្តាលផ្លូវការ Tasnim បានឲ្យដឹងថា អ៊ីស្រាអែលបានវាយប្រហារទីស្នាក់ការកណ្តាលក្រសួងការពារជាតិអ៊ីរ៉ង់ ស្ថិតនៅទីក្រុងតេអេរ៉ង់ នៅព្រឹកថ្ងៃអាទិត្យនេះ ។

ក្រុមមន្រ្តីអ៊ីរ៉ង់ និយាយផងដែរថា ដឺប៉ូស្តុកប្រេង Shahran ស្ថិតនៅភាគពាយ័ព្យទីក្រុងតេអេរ៉ង់ រងការវាយប្រហារដោយអ៊ីស្រាអែល ។ សារព័ត៌មាន Tasnim រាយការណ៍ថា កងកម្លាំងជួយសង្រ្គោះ បានមកដល់កន្លែងកើតហេតុ ដើម្បីព្យាយាមពន្លត់ភ្លើង ។

ទូរទស្សន៍ Channel 13 របស់អ៊ីស្រាអែល រាយការណ៍ថា មីស៊ីលបានវាយប្រហារទីក្រុង Haifa និងទីក្រុង Tamra ។ ការវាយប្រហារទីក្រុង Haifa ត្រូវបានគេព្យាករណ៍ដឹងមុន ស្របពេលដែលទីក្រុងមួយនេះ ជាបណ្តុំហេដ្ឋារចនាសម្ព័ន្ធឧស្ម័នយុទ្ធសាស្រ្ត ។

ក្រុមអ្នកវិភាគលើកឡើងថា នេះគ្រាន់តែជាការចាប់ផ្តើមសងសឹកតាមសន្យារបស់អ៊ីរ៉ង់ប៉ុណ្ណោះ សម្រាប់ការទម្លាក់គ្រាប់បែករបស់អ៊ីស្រាអែលលើទីតាំងថាមពលសំខាន់ៗនៅទីក្រុង Bushehr និងទីក្រុង Abadan ៕