រដ្ឋមន្ត្រីការបរទេសអ៊ីរ៉ង់ លោក Abbas Araqchi បាននិយាយនៅថ្ងៃអាទិត្យ (១៥ មិថុនា) នេះថា អ៊ីរ៉ង់ មិនចង់ឱ្យជម្លោះរបស់ខ្លួនជាមួយអ៊ីស្រាអែល ត្រូវពង្រីកដល់ប្រទេសជិតខាងទេ លុះត្រាតែស្ថានការណ៍បង្ខំ ដោយបន្ថែមថា ការវាយប្រហារឆ្លើយតបទៅវិញរបស់អ៊ីរ៉ង់ ផ្អែកលើការការពារខ្លួនប៉ុណ្ណោះ។

លោក Araqchi លើកឡើងថា ទីក្រុងតេអេរ៉ង់ បាននិងកំពុងឆ្លើយតបទៅនឹងការឈ្លានពានរបស់បរទេស ហើយថា ប្រសិនបើការឈ្លានពាននេះបញ្ឈប់ នោះប្រតិកម្មរបស់អ៊ីរ៉ង់ ក៏នឹងឈប់ដែរ។ រដ្ឋមន្ត្រីការបរទេសរូបនេះបន្តថា ការវាយប្រហាររបស់អ៊ីស្រាអែល លើមូលដ្ឋានឧស្ម័ន South Pars របស់អ៊ីរ៉ង់ ចែករំលែកជាមួយកាតា គឺជា "ការឈ្លានពានយ៉ាងម៉ឺងម៉ាត់ និងជាទង្វើដ៏គ្រោះថ្នាក់បំផុត"។

លោកបន្ថែមថា "ការអូសទាញជម្លោះទៅកាន់តំបន់ឈូងសមុទ្រពែក្ស គឺជាកំហុសយុទ្ធសាស្ត្រ ហើយគោលបំណងរបស់អ៊ីស្រាអែល គឺចង់អូសសង្រ្គាមឱ្យហួសពីទឹកដីអ៊ីរ៉ង់"។ ប្រមុខការបរទេសរូបនេះបានចោទអ៊ីស្រាអែល ថាកំពុងបំផ្លាញកិច្ចចរចានុយក្លេអ៊ែរដែលកំពុងបន្តរវាងអ៊ីរ៉ង់-អាមេរិក ដែលលោកនិយាយថា អាចបើកផ្លូវសម្រាប់កិច្ចព្រមព្រៀងមួយ។

គួបញ្ជាក់ថា ទីក្រុងតេអេរ៉ង់ ត្រូវបានកំណត់ថានឹងបង្ហាញសំណើមួយរបស់ខ្លួននៅថ្ងៃអាទិត្យនេះ ក្នុងអំឡុងកិច្ចចរចានុយក្លេអ៊ែរជុំទី៦ ដែលត្រូវបានលុបចោល បន្ទាប់ពីមានការកើនឡើងនៃជម្លោះដ៏តានតឹងនាពេលថ្មីៗនេះរវាងអ៊ីស្រាអែល និងអ៊ីរ៉ង់ ដែលជាសត្រូវដ៏យូរអង្វែង៕