ទូរទស្សន៍ CNN-News18 បាននិយាយថា មនុស្សយ៉ាងហោចណាស់ ៦នាក់បានស្លាប់ និង២៥នាក់ផ្សេងទៀត ត្រូវបានទឹកហូរនាំកាលពីថ្ងៃអាទិត្យ ទី១៥ ខែមិថុនា បន្ទាប់ពីស្ពានមួយកន្លែងបានបាក់នៅលើទន្លេ Indrayani ក្នុងទីក្រុង Pune ភាគខាងលិចប្រទេសឥណ្ឌា។ សាក្សី បាននិយាយថា មានអ្នកទេសចរមួយក្រុមនៅលើស្ពាន នៅពេលស្ពានបាក់។ ប្រតិបត្តិការជួយសង្គ្រោះ ដឹកនាំដោយកងកម្លាំងឆ្លើយតបគ្រោះមហន្តរាយជាតិ កំពុងធ្វើការ។

អ្នកទេសចរជាច្រើននាក់ ត្រូវបានគេបារម្ភថា ត្រូវបានទឹកហូរនាំ បន្ទាប់ពីស្ពានបាក់នៅលើទន្លេ Indrayani ក្នុងទីក្រុង Pune ភាគខាងលិចប្រទេសឥណ្ឌា។

រដ្ឋមន្រ្ដីប្រចាំរដ្ឋ Maharashtra លោក Devendra Fadnavis បាននិយាយថា មនុស្សយ៉ាងហោចណាស់៦នាក់ស្លាប់ និងមួយចំនួនទៀតត្រូវបានទឹកហូរនាំ។

លោកបាននិយាយនៅលើវេទិកាបណ្តាញផ្សព្វផ្សាយសង្គម X ថា «មនុស្សមួយចំនួនត្រូវបានទឹកហូនាំ ដូច្នេះប្រតិបត្តិការស្វែងរកកំពុងដំណើរការដើម្បីស្វែងរកពួកគេ ដោយមនុស្ស៣២នាក់ បានរងរបួស ហើយ៦នាក់ក្នុងចំណោមពួកគេស្ថិតក្នុងស្ថានភាពធ្ងន់ធ្ងរ។

លោកបាននិយាយថា កងកម្លាំងឆ្លើយតបគ្រោះមហន្តរាយជាតិ ត្រូវបានដាក់ពង្រាយនៅនឹងកន្លែងកើតហេតុ ហើយទីភ្នាក់ងារផ្សេងទៀត ត្រូវបានណែនាំឲ្យរក្សាការប្រុងប្រយ័ត្នខ្ពស់។