ប្រជាជនប៉ាឡេស្ទីននៅតំបន់ហ្កាហ្សាស្រ្ទីប បានសម្ដែងក្ដីកង្វល់របស់ខ្លួនថា ពួកគេពិតជាព្រួយបារម្ភណាស់ថា ជម្លោះកាន់តែខ្លាំងក្លាឡើងរវាងអ៊ីស្រាអែល និងអ៊ីរ៉ង់ កំពុងផ្លាស់ប្តូរការយកចិត្តទុកដាក់របស់ពិភពលោក ឱ្យចាកឆ្ងាយពីវិបត្តិមនុស្សធម៌ដ៏បន្ទាន់ និងធ្ងន់ធ្ងររបស់ពួកគេ។

ខណៈពេលដែលយន្តហោះយោធាអ៊ីស្រាអែល បានទម្លាក់គ្រាប់បែកលើទីតាំងនុយក្លេអ៊ែរអ៊ីរ៉ង់ ហើយអ៊ីរ៉ង់ បានបាញ់មីស៊ីលបាលីស្ទិកទៅកាន់ទីក្រុងនានារបស់អ៊ីស្រាអែល ក្នុងប៉ុន្មានថ្ងៃកន្លងមកនេះ ប្រជាជនប៉ាឡេស្ទីន នៅតំបន់ហ្កាហ្សា កំពុងបន្តជួបការលំបាកក្នុងការស្វែងរកស្បៀងអាហារចម្អែតក្រពះ បណ្ដាញអ៊ីនធឺណិតត្រូវកាត់ផ្ដាច់ និងបន្តរត់គេចពីការវាយប្រហារ។

ជនជាតិប៉ាឡេស្ទីនដែលរស់នៅក្នុងលំនៅឋានបែកបាក់ក្នុងទីក្រុងហ្កាហ្សា បាននិយាយថា "ពេលនេះ គ្រប់គ្នាកំពុងនិយាយតែពីអ៊ីរ៉ង់ ហើយហ្កាហ្សាបានក្លាយជាបញ្ហាបន្ទាប់បន្សំប៉ុណ្ណោះ"។ អ្នកស្រុកហ្កាហ្សាទាំងនោះបន្ថែមថា អ្វីដែលគួរឱ្យបារម្ភជាងនេះទៅទៀតគឺថា ជម្លោះអ៊ីស្រាអែល-អ៊ីរ៉ង់ អាចបំផ្លាញកិច្ចប្រឹងប្រែងដែលត្រូវការយ៉ាងខ្លាំង ដើម្បីសម្រេចបានបទឈប់បាញ់នៅតំបន់ហ្កាហ្សា។

កិច្ចខិតខំប្រឹងប្រែងម្តងហើយម្តងទៀតក្នុងការបង្កើតកិច្ចព្រមព្រៀងរវាងអ៊ីស្រាអែល និងក្រុមហាម៉ាស បានបរាជ័យក្នុងប៉ុន្មានខែថ្មីៗនេះ ដោយអ៊ីស្រាអែល បាននិយាយថា ខ្លួននឹងបញ្ចប់សង្គ្រាមបន្ទាប់ពីកម្ចាត់ក្រុមហាម៉ាសឱ្យអស់ ហើយក្រុមហាម៉ាសនិយាយថា ខ្លួននឹងមិនចុះចាញ់ឡើយ៕