ភ្នំពេញ៖ សហព័ន្ធស្រូវអង្ករកម្ពុជា រំពឹងទុកថា ឆ្នាំ ២០២២ ការនាំចេញស្រូវអង្ករកម្ពុជា នឹងភាពល្អប្រសើរឡើងវិញ ដោយនឹងមានកំណើនខ្ពស់ជាងឆ្នាំ២០២០ លើបរិមាណនាំចេញសរុបចន្លោះពី ៧៥ទៅ ៨០ម៉ឺនតោន។
ឧកញ៉ា ហ៊ុន ឡាក់ ប្រធានក្រុមប្រឹក្សាភិបាលសហព័ន្ធស្រូវអង្ករកម្ពុជា លើកឡើងនៅក្នុងកម្មវិធីសន្និបាតបូក សរុបការងារពាណិជ្ជកម្ម ឆ្នាំ២០២១ និងទិសដៅពាណិជ្ជកម្មឆ្នាំ២០២២ នៅថ្ងៃទី ២៣ ខែធ្នូ ឆ្នាំ២០២១ នេះថា ចំពោះស្ថានភាព និងការ ប្រឈមរបស់វិស័យស្រូវអង្ករកម្ពុជាក្នុងឆ្នាំ ២០២១នេះ ប្រទេសកម្ពុជា ក៏ដូចជាពិភព លោកទាំងមូល បានទទួលរងនូវភាពរាំងស្ទះ ពាណិជ្ជកម្មទៅកាន់ទីផ្សារអន្តរជាតិ ដោយសារជំងឺឆ្លងកូវីដ-១៩ ក្នុងនោះ សម្រាប់ស្រូវអង្ករកម្ពុជា ក៏ទទួលរងនូវផលប៉ះពាល់មួយ ចំនួនដែរ ជាពិសេសគឺការកើនឡើងនូវតម្លៃ ដឹកជញ្ជូនតាមកប៉ាល់ និងកង្វះទូកុងតឺន័រ បានធ្វើឱ្យការនាំចេញអង្ករមិនទទួលបាននូវ កំណើនដូចការរំពឹងទុក។
ជាក់ស្ដែងការនាំចេញអង្ករក្នុងរយៈពេល ១១ ខែ ឆ្នាំ ២០២១ នេះ បានចំនួនជាង ៥៣ ម៉ឺនតោន គិតជាទឹក ប្រាក់មានចំនួនជាង ៣៦៦លានដុល្លារអាមេរិក ដែលបរិមាណនាំចេញនេះមានការធ្លាក់ចុះចំនួនជិត ១២ភាគរយ បើប្រៀបធៀបទៅនឹងរយៈពេលដូច គ្នាក្នុងឆ្នាំ ២០២០។
ប្រទេសដែលទិញអង្ករកម្ពុជាច្រើនជាងគេគឺ ប្រទេសចិនចំនួន ៥០ភាគរយ នៃការនាំចេញសរុប ស្មើនឹងបរិមាណជាង ២៥ ម៉ឺនតោន, ការនាំចេញទៅកាន់សហគមន៍អឺរ៉ុប ២៥ភាគរយ ខណៈ ការនាំចេញទៅកាន់ប្រទេសក្នុងតំបន់អាស៊ាន ជាពិសេស ម៉ាឡេស៊ី ព្រុយណេ និងសិង្ហបូរីជាង ៥៤ពាន់តោន ចំណែកគោលដៅផ្សេងទៀតមានប្រទេសហ្កាប៊ុង អូស្ត្រាលី ណូវែសេឡង់ជាដើម។
លោកឧកញ៉ា បានលើកឡើងលើស្ថានភាពរួម នៃឆ្នាំ២០២១ ដោយឈរលើគោលការណ៍ការវាយតម្លៃជា ប្រចាំ និងឈរលើមូលដ្ឋាននៃការអនុវត្តន៍ជាក់ស្តែង ការនាំចេញអង្កររបស់កម្ពុជាអាចស្ថិតក្នុងបរិមាណជុំវិញ ៦៣ម៉ឺនតោន ដែលមានការធ្លាក់ចុះជារួមប្រមាណជា ៧.៥ភាគរយ។
បើតាមការរំពឹងទុក នៅឆ្នាំ២០២២ គឺមានការប្រសើរឡើងវិញ និងមានកំនើនខ្ពស់ជាង ឆ្នាំ២០២០ លើបរិមាណនាំចេញសរុបចន្លោះពី ៧៥ទៅ ៨០ ម៉ឺនតោន ដោយសារកត្តាមួយចំនួនរួមមាន៖ ទីផ្សារប្រទេសចិន, តាមរយៈការចុះអនុស្សរណយោគយល់រវាងកម្ពុជា-ចិន លើកទី៦ លើបរិមាណអង្ករចំនួន ៤០ ម៉ឺនតោន បន្ថែមលើយន្តការទីផ្សារដែល ប្រទេសចិន ក្រៅពីនេះ ប្រទេសចិន ជាពិសេសក្រុមហ៊ុនសាជីវកម្មចំណីអាហារ (COFCO) នឹងជួយលើកកម្ពស់អង្ករកម្ពុជាផងដែរ។
ចំណែកទីផ្សារសហគមន៍អឺរ៉ុប នឹងត្រូវបន្តកើនឡើង និងវិលទៅរកប្រក្រតីភាពវិញ ដោយកានាំចូលដោយសេរី គ្មានការបង់ ពន្ធអាករនាំចូល បន្ទាប់ពីការបញ្ចប់នូវការដាក់ទណ្ឌកម្មលើវិធានរក្សាការពារ ៣ឆ្នាំ ដែលត្រូវដល់កាលកំណត់។
សម្រាប់ទីផ្សារ ក្នុងតំបន់អាស៊ានវិញ៖ អាចនឹងបន្តនៅស្ថិរភាពនៃការផ្គត់ផ្គង់លើអង្ករក្រអូបសម្រាប់ប្រទេស ម៉ាឡេស៊ី ព្រុយណេ និងសិង្ហបុរី រួមនឹងទីផ្សារសក្ដានុពលថ្មីទៀតគឺ ប្រទេសទីម័រខាងកើត។ ដោយឡែកទីផ្សារ ផ្សេងៗរួមមាន៖ ប្រទេសហ្កាប៊ុង អូស្ត្រាលី ណូវែលសេឡង់ តួគី និងបណ្តាប្រទេសមួយចំនួននៅមជ្ឈិមបូព៌ា និងអាហ្វ្រិច នឹងបន្តកើនឡើងផងដែរ៕ អត្ថបទ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
