វិមានក្រឹមឡាំង នៅថ្ងៃចន្ទ (ទី១៦ ខែមិថុនា) បានប្រាប់ឲ្យដឹងថា ប្រទេសរុស្ស៊ីនៅតែត្រៀមរួចរាល់ ក្នុងដើរតួនាទីសម្របសម្រួល ក្នុងជម្លោះ រវាងអ៊ីស្រាអែល និងអ៊ីរ៉ង់ ហើយសំណើពីមុនរបស់ទីក្រុងមូស្គូ ក្នុងការរក្សាទុកសារធាតុអ៊ុយរ៉ានីញ៉ូមរបស់អ៊ីរ៉ង់ ក្នុងកន្លែងស្តុកសុវត្ថិភាព នៅប្រទេសរុស្ស៊ី នៅតែស្ថិតក្នុងការពិភាក្សា។

ទីក្រុងតេអេរ៉ង់ប្រាប់ថា ខ្លួនមានសិទ្ធិទទួលបានថាមពលនុយក្លេអ៊ែរដោយសន្តិភាព ប៉ុន្តែកម្មវិធីចម្រាញ់សារធាតុអ៊ុយរ៉ានីញ៉ូមដែលវិវត្តយ៉ាងឆាប់រហ័សរបស់ខ្លួន បានធ្វើឲ្យមានការភ័យខ្លាចយ៉ាងទូលំទូលាយ ទាំងពីលោកខាងលិច និងទូទាំងរដ្ឋឈូងសមុទ្រ ដែលថា ប្រទេសនេះចង់អភិវឌ្ឍអាវុធនុយក្លេអ៊ែរ។

មុនពេលអ៊ីស្រាអែលបើកការវាយប្រហារលើសាធារណរដ្ឋឥស្លាម រុស្ស៊ីបានលើកឡើងកាលពីសប្តាហ៍មុនថា ខ្លួនបានត្រៀមខ្លួនរួចជាស្រេច ក្នុងការយកសារធាតុអ៊ុយរ៉ានីញ៉ូមដែលចម្រាញ់ហើយចេញពីប្រទេសអ៊ីរ៉ង់ ហើយបំប្លែងវាទៅជាឥន្ធនៈរ៉េអាក់ទ័រស៊ីវិល ដែលជាវិធីដ៏មានសក្ដានុពលមួយ ដើម្បីរម្ងាប់វិបត្តិនេះ។

អ្នកនាំពាក្យវិមានក្រឹមឡាំង លោក Dmitry Peskov បាននិយាយថា៖ «សំណើនេះនៅតែស្ថិតក្នុងការពិភាក្សា ដោយវានៅតែពាក់ព័ន្ធដដែល។ ប៉ុន្តែជាការពិតណាស់ ដោយការផ្ទុះឡើងនូវអរិភាព ស្ថានភាពបានក្លាយទៅជាភាពស្មុគស្មាញកាន់តែខ្លាំង»៕