ភ្នំពេញ៖ មន្ត្រីជាន់ខ្ពស់នៃក្រសួងសេដ្ឋកិច្ច និងហិរញ្ញវត្ថុ បានបញ្ជាក់ថា ថ្វីត្បិតតែស្ថានភាពកូវីដ១៩ នៅកម្ពុជា បានធូរស្រាលឡើងវិញក៏ពិតមែន តែរដ្ឋាភិបាលកម្ពុជាក៏នៅតែបន្តយកចិត្តទុកដាក់លើបញ្ហា ប្រឈមដែលនឹងកើតឡើង ចំពោះមុខជាក់ស្ដែងនៅក្នុងឆ្នាំ២០២២ខាងមុខ គ្រោងនឹងចំណាយថវិកាចំនួនជាង ១ពាន់លានដុល្លារអាម៉េរិក សម្រាប់ដោះស្រាយបញ្ហានានាបណ្ដាលមកពីកូវីដ-១៩។
លើកឡើងក្នុងពិធីបិទសន្និបាតបូកសរុបការងាររបស់ក្រសួងពាណិជ្ជកម្ម កាលពីល្ងាចថ្ងៃទី២៣ ធ្នូ ឆ្នាំ២០២១ កន្លងទៅ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ថា ចាប់តាំងពីកម្ពុជាបានជួបប្រទះនឹងបញ្ហាកូវីដ១៩ រដ្ឋាភិបាលបានដាក់ចេញវិធានការជា បន្តបន្ទាប់ដើម្បីស្ដារអាជីវកម្ម ជំរុញសេដ្ឋកិច្ចឱ្យងើបឡើងវិញ និងទំនុកបម្រុងដល់ជីវភាពប្រចាំរបស់ប្រជាពលរដ្ឋជា ពិសេសពលរដ្ឋក្រីក្រ។
ជាក់ស្ដែងក្នុងឆ្នាំ២០២០ រដ្ឋាភិបាលបានប្រើប្រាស់ថវិកាប្រមាណជាង ៨២០លានដុល្លារ សម្រាប់កិច្ចអន្តរាគមន៍ ផ្នែកសុខាភិបាល សង្គម និងសេដ្ឋកិច្ច ហើយឆ្នាំ២០២១ រដ្ឋាភិបាល ក៏បានបង្កើនការ ចំណាយរបស់ខ្លួនលើបញ្ហា កូវីដ១៩ រហូតដល់ជាង ១.៤០០លានដុល្លារ។
ឯកឧត្ដម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម នៅក្នុងអង្គប្រជុំខាងលើនេះ បានបញ្ជាក់ថា ដោយសារតែ រដ្ឋាភិបាលបានបង្កើនការចំណាយទៅលើការប្រឆាំងនឹងកូវីដ១៩ ក្រសួងពាណិជ្ជកម្មក៏បានសន្សំសំចៃដល់ការ ចំណាយ ដោយកាត់បន្ថយការចំណាយណាមិនចាំបាច់ ដើម្បីចូលរួមដល់ការចំណាយជារួមរបស់រាជរដ្ឋាភិបាល ក្នុងការប្រយុទ្ធនឹងកូវីដ-១៩នេះដែរ៕ អត្ថបទ៖ ឈិត បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
