ក្រុមមន្ត្រីក្រុងគីវ បាននិយាយថា រលកនៃយានដ្រូន និងមីស៊ីលយ៉ាងសន្ធឹករបស់រុស្ស៊ី បានវាយប្រហារលើតំបន់នានាទូទាំងរដ្ឋធានីគីវ របស់អ៊ុយក្រែន នៅព្រឹកថ្ងៃអង្គារ (១៧ មិថុនា) នេះ ដោយបានបំផ្លិចបំផ្លាញអគារផ្ទះល្វែងមួយកន្លែង បង្កឱ្យមានអគ្គិភ័យដ៏ធំ និងធ្វើឱ្យមនុស្សយ៉ាងតិច ២០នាក់រងរបួស។

សាក្សីរបស់សារព័ត៌មានរ៉យទ័របាននិយាយថា យានដ្រូនជាច្រើនគ្រឿងបានវាយលុកពាសពេញរដ្ឋធានី ហើយពួកគេបានឮនូវអ្វីដែលហាក់ដូចជាសំឡេងមីស៊ីលហោះពីលើអាកាស។ ប្រព័ន្ធប្រកាសអាសន្នវាយប្រហារផ្លូវអាកាសនៅតែមានប្រសិទ្ធភាព ច្រើនជាង ៧ម៉ោងបន្ទាប់ពីដាក់ដំណើរការ។

ផ្នែកផ្សេងទៀតនៃអ៊ុយក្រែន ក៏រងការវាយប្រហារផងដែរ រួមទាំងតំបន់នៅខាងក្រៅរដ្ឋធានី និងទីក្រុង Zaporizhzhia ភាគអាគ្នេយ៍ ដែលអភិបាលតំបន់រាយការណ៍ថា មានការវាយប្រហារយ៉ាងហោចណាស់ ៤លើក។ លោក Tymur Tkachenko ប្រធានរដ្ឋបាលយោធាទីក្រុងគីវ បានបញ្ជាក់ថា មានការវាយប្រហារចំនួន ១២លើកនៅក្នុងស្រុកចំនួន៥ ហើយក្នុងចំណោមគោលដៅទាំងនោះ រួមមានសាលាមត្តេយ្យមួយកន្លែងនៅភាគខាងកើតក្រុង។

ទាំងអ៊ុយក្រែន និងរុស្ស៊ី បានបើកការវាយប្រហារដោយយានដ្រូនដាក់គ្នាក្នុងប៉ុន្មានសប្តាហ៍ថ្មីៗនេះ ខណៈភាគីទាំងពីរបានបើកកិច្ចពិភាក្សាដោយផ្ទាល់ចំនួន ២លើក ស្តីពីការបញ្ចប់សង្រ្គាមអាយុកាលជាង ៣ឆ្នាំមកនេះ។ កិច្ចចរចាទាំង ២ជុំនោះបានបង្កើតកិច្ចព្រមព្រៀងស្តីពីការដោះលែងឈ្លើយសឹក និងការប្រគល់សាកសពទាហានដែលបានស្លាប់ ប៉ុន្តែពុំមានវឌ្ឍនភាពធំដុំលើសន្តិភាពនោះទេ៕