នៅទីស្តីការក្រសួងសុខាភិបាល កាលពីរសៀលថ្ងៃទី១៦ ខែមិថុនា ឆ្នាំ២០២៥ ឯកឧត្ត​ម​សាស្រ្តា​ចារ្យ ​ឈាង រ៉ា រដ្ឋមន្រ្តីក្រសួងសុខាភិបាល បានដឹកនាំ​កិច្ច​ប្រជុំ​ពង្រឹង​គុណភាព​នៃ​ការ​បម្រើ​សេវា​សុខា​ភិបាល នៅគ្រប់កម្រិតមណ្ឌលសុខភាព ដល់មន្ទីរពេទ្យជាតិ ខេត្ត ស្រុក ដែលមានការ​អញ្ជើញ​ចូល​រួមដោយផ្ទាល់ពីថ្នាក់ដឹកនាំក្រសួង មន្ទីរពេទ្យជាតិ និងតាមប្រព័ន្ធ Zoom មន្ទីរ​សុខាភិបាល នៃ​រដ្ឋបាលខេត្ត។

ឯកឧត្តមសាស្រ្តាចារ្យរដ្ឋមន្រ្តី បានណែនាំដល់ថ្នាក់ដឹកនាំក្រសួង មន្ទីរពេទ្យជាតិ និង​មន្ទីរ​សុខាភិបាល​ខេត្ត ត្រូវត្រៀមលក្ខណៈឱ្យបានល្អ ដូចខាងក្រោម៖

១) ត្រូវរៀប​ចំ​ផែនការ និងសហការជាមួយស្ថាប័ន អង្គភាពពាក់ព័ន្ធ ដើម្បីធានា​ឱ្យ​បាន​សេវា​ថែ​ទាំ​សុខ​ភាព​សាធារណៈជូនប្រជាពលរដ្ឋ ជាពិសេសនៅតាមតំបន់ព្រំដែន ប្រកបដោយគុណភាព ប្រសិ​ទ្ធ​ភាព និងសមធម៌

២) ត្រៀមលក្ខណៈក្នុងការគាំទ្រដល់ប្រជាពលរដ្ឋ ដែលត្រូវធ្វើការចល័តទីតាំង ទៅទីកន្លែង​មាន​សុវត្ថិភាព ដោយត្រៀមរៀបចំនូវស្បៀងអាហារ ឱសថ ទឹកស្អាត មុង ក្រមា និងសម្ភារ ឱសថ​ប្រើ​ប្រាស់​សំខាន់ ជាពិសេសជំងឺឆ្លងផ្សេងៗ

៣) ត្រូវពង្រឹង និងយកចិត្តទុកដាក់បន្ថែមទៀត នូវការបម្រើសេវាពិនិត្យ និងព្យាបាល នៅតាម​មន្ទីរ​ពេទ្យ​ខេត្ត និងមន្ទីរពេទ្យបង្អែកស្រុក ជាពិសេសនៅតាមតំបន់ព្រំដែន

៤) ធ្វើ​ការសហការជាមួយមន្រ្តីរដ្ឋបាលរាជធានី ខេត្ត គ្រប់លំដាប់​ថ្នាក់​ក្នុង​គោល​បំណង​ធ្វើ​កិច្ច​សហ​ប្រតិបត្តិការរួមគ្នាដោយស្មារតីសាមគ្គី

៥) សូមរក្សានូវការទំនាក់ទំនងគ្នា និងផ្តល់ព័ត៌មានជូនក្រុមការងារឱ្យបានជាប់ជានិច្ច ដើម្បី​ទទួល​បាន​កិច្ចអន្តរាគមន៍ទាន់ពេលវេលា នៅពេលចាំបាច់

៦) រៀបចំផែន​ការ​សកម្មភាព និងបត់បែនទៅតាមសភាពការជាក់ស្តែង ស្របតាមពេលវេលា និង​ធន​ធាន​ដែល​មាន ដើម្បីឱ្យការងារកាន់តែមានប្រសិទ្ធភាព។

ឯកឧត្តមសាស្រ្តាចារ្យរដ្ឋមន្រ្តី បានណែនាំនៅតាមមន្ទីរពេទ្យជាតិ និងមន្ទីរពេទ្យបង្អែកស្រុក ខេត្ត ត្រូវ​ត្រៀមនូវការសង្រ្គោះបន្ទាន់ គ្រូពេទ្យប្រចាំការ ការរៀបចំសម្ភារៈបរិក្ខារពេទ្យ ការផ្គត់ផ្គង់ឱសថ និង​ឈាម សម្រាប់ត្រៀមក្នុងការជួយសង្រ្គោះអាយុជីវិត ក្នុងករណីមាន​​ការ​កើត​ឡើង​មួយ​ជា​យ​ថា​ហេតុ​ ដើម្បីធានាការបម្រើសេវាសុខាភិបាលដល់ប្រជាជន និងបងប្អូន​ពលករ​ដោយ​ការ​យក​ចិត្ត​ទុក​ដាក់​ខ្ពស់​៕ អត្ថបទ រដ្ឋា