យន្តហោះចម្បាំងអ៊ីស្រាអែល កាលពីថ្ងៃចន្ទ (១៦ មិថុនា) បានវាយប្រហារទម្លាក់គ្រាប់បែកលើទីស្នាក់ការរបស់ទូរទស្សន៍រដ្ឋរបស់អ៊ីរ៉ង់ឈ្មោះ IRIB នៅក្នុងទីក្រុងតេអេរ៉ង់ បន្ទាប់ពីយោធាអ៊ីស្រាអែល បានប្រាប់អ្នកស្រុកនៃតំបន់រដ្ឋធានីនោះឱ្យជម្លៀសខ្លួនចេញជាបន្ទាន់។

ការផ្សាយផ្ទាល់មួយនៅលើប៉ុស្តិ៍ទូរទស្សន៍នៃសាធារណរដ្ឋអ៊ិស្លាមអ៊ីរ៉ង់ IRIB ត្រូវបានរំខានមួយរយៈពេលខ្លី បន្ទាប់ពីមានសំឡេងផ្ទុះដ៏ធំ ហើយបណ្ដាញអគ្គិសនីក្នុងបន្ទប់ផ្សាយស្ទូឌីយោបានរលត់។ ប្រព័ន្ធផ្សព្វផ្សាយអ៊ីរ៉ង់ បានរាយការណ៍ថា បុគ្គលិកជាច្រើននាក់ត្រូវបានសម្លាប់ក្នុងការវាយប្រហារនោះ។

យោធាអ៊ីស្រាអែល និយាយថា ខ្លួនបានកំណត់គោលដៅ "មជ្ឈមណ្ឌលទំនាក់ទំនងនៃរបបអ៊ីរ៉ង់" ខណៈក្រសួងការបរទេសអ៊ីរ៉ង់ និយាយថា ការវាយប្រហារនេះគឺជា "ឧក្រិដ្ឋកម្មសង្គ្រាម"។ ទន្ទឹមនឹងនោះ អ្នកស្រុកក្នុងក្រុងតេអេរ៉ង់ ហាក់ដូចជាកំពុងភៀសខ្លួនយ៉ាងច្រើន ជាមួយនឹងរូបភាពប្រព័ន្ធផ្សព្វផ្សាយបានបង្ហាញពីការកកស្ទះចរាចរណ៍លើដងផ្លូវហាយវេមួយឆ្ពោះទៅភាគខាងជើង។

រដ្ឋមន្ត្រីការពារជាតិអ៊ីស្រាអែល លោក Israel Katz បានហៅទូរទស្សន៍ IRIB ថាជា "អាជ្ញាធរផ្សាយការឃោសនា និងការញុះញង់របស់របបអ៊ីរ៉ង់"។ អ្នកនាំពាក្យក្រសួងការបរទេសអ៊ីរ៉ង់ លោក Esmail Baqai បានថ្កោលទោសការវាយប្រហារនេះ ដោយនិយាយថាជា "ទង្វើដ៏អាក្រក់" និងជា "ឧក្រិដ្ឋកម្មសង្គ្រាម"៕