ស្ថានទូតឥណ្ឌាប្រចាំកម្ពុជា បានដឹកនាំគណៈប្រតិភូជាអ្នកវិនិយោគមកពី ២៦ក្រុមហ៊ុន ពីប្រទេសឥណ្ឌា ដើម្បីស្វែងរកដៃគូវិនិយោគជាមួយភាគីកម្ពុជា។ ការរៀបចំជំនួប ពិភាក្សាវិនិយោគរួមគ្នារវាងក្រុមហ៊ុនមកពីប្រទេសឥណ្ឌា និងក្រុមហ៊ុនកម្ពុជា ធ្វើឡើងនាព្រឹកថ្ងៃទី ១៧ ខែមិថុនា ឆ្នាំ ២០២៥។
ជំនួបរវាងក្រុមអ្នកវិនិយោគមកពីប្រទេសឥណ្ឌា និងក្រុមអ្នកវិនិយោគកម្ពុជា ជាព្រឹត្តិការណ៍សំខាន់មួយ ដែលស្ថានទូតឥណ្ឌាប្រចាំកម្ពុជា រៀបចំឡើង។ ជាក់ស្ដែងសម្រាប់ការរៀបចំនៅក្នុងឆ្នាំ២០២៥នេះ ស្ថានទូតឥណ្ឌា បានដឹកនាំក្រុមអ្នកវិនិយោគរហូតដល់ ២៦ក្រុមហ៊ុន ដើម្បីស្វែងរកដៃគូវិនិយោគរួមគ្នា ជាមួយបណ្ដាក្រុមហ៊ុន និងអ្នកវិនិយោគនៅកម្ពុជា។
ក្នុងពិធីបើកដែលរៀបចំឡើងនៅថ្ងៃនេះ ឯកឧត្តម វ៉ាន់ឡាល់វ៉ាណា បាវីដលុង Vanlalvawna Bawitlung ឯកអគ្គរដ្ឋទូតឥណ្ឌាប្រចាំកម្ពុជា ក៏បានសម្ដែងការស្វាគមន៍ចំពោះក្រុមហ៊ុនពីប្រទេសឥណ្ឌា ដែលមកស្វែងរកឱកាសវិនិយោគនៅកម្ពុជានាពេលនេះ។ ឯកឧត្តមក៏បានលើកឡើងកោតសសើរ និងប្រាប់ទៅកាន់ក្រុមអ្នកវិនិយោគឥណ្ឌាពីភាពរីកចម្រើនរបស់កម្ពុជា ពិសេសកំណើនសេដ្ឋកិច្ចដែលកម្ពុជាសម្រេចបាន។
សម្រាប់កម្មវិធីនេះដែរ ឯកឧត្តម សុក ស៊ីផាន់ណា ទេសរដ្ឋមន្ត្រីនៃរាជរដ្ឋាភិបាលកម្ពុជា មើលឃើញថា វាជារឿងល្អសម្រាប់កម្ពុជា។ កម្មវិធីនេះ ជាផ្នែកបន្ថែមមួយទៀត សម្រាប់ការធ្វើពិពិធកម្មសេដ្ឋកិច្ចរបស់កម្ពុជា ដែលកម្ពុជា ចាប់យកគ្រប់ភាគី គ្រប់ប្រទេស សម្រាប់ការបន្តភាពរីកចម្រើន។
គួរបញ្ជាក់ឱ្យដឹងដែរថា ក្រុមហ៊ុនមកពីប្រទេសឥណ្ឌាទាំង ២៦ក្រុមហ៊ុននេះ គឺផ្តោតលើជំនាញ វិស័យផ្សេងគ្នា ដោយភាគច្រើនផ្តោតលើវិស័យកសិកម្ម។ ក្រុមហ៊ុនទាំងនោះ មានក្រុមហ៊ុន ផលិតជីកសិកម្ម ជីសេរីរាង្គ និង កែឆ្នៃ ផលិតផលកសិកម្ម វិស័យឪសថសាស្រ្ត វិស័យសុខាភិបាល វិស័យអេឡិចត្រូនិច និងវិស័យហិរញ្ញវត្ថុជាដើម។
ជាការកត់សម្គាល់ ក្រុមអ្នកវិនិយោគកម្ពុជា ជាច្រើនក៏បានចូលរួមក្នុងកម្មវិធីនេះដែរ។ ក្រោយបញ្ចប់កម្មវិធីបើកជាផ្លូវការ ក្រុមអ្នកវិនិយោគមកពីប្រទេសឥណ្ឌា និងក្រុមអ្នកវិនិយោគកម្ពុជា បានអង្គុយរួមគ្នា ពិភាក្សាលម្អិតពីក្រុមហ៊ុន ក៏ដូចជាផលិតផល ដើម្បីអាចឈានដល់ការវិនិយោគរួមគ្នា៕ អត្ថបទ៖ គឹមហុក
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
