ប្រធានាធិបតីទួរគីលោក Recep Tayyip Erdogan និយាយថា ប្រទេសអ៊ីស្រាអែល កំពុងប្រឈមនឹងអត្ថិភាពផ្ទាល់ខ្លួនជាមួយនឹងសកម្មភាពខ្លួនឯង ។

លោកនិយាយថា ក្នុងនាមជាប្រទេសទួរគី ពួកយើងបានបង្ហាញយ៉ាងច្បាស់ទៅកាន់គូសន្ទនារបស់ពួកយើងទាំងអស់ថា ពួកយើងត្រៀមខ្លួនរួចរាល់ក្នុងការធ្វើអ្វីក៏ដោយឲ្យតែចាំបាច់ រួមទាំងការសម្របសម្រួលផងដែរ ។

លោកបន្តថា ជាបឋម វាសំខាន់ខ្លាំងណាស់ត្រូវដឹងថា គ្មាននរណាម្នាក់អាចព្យាករដឹងមុនថានឹងមានអ្វីកើតឡើងនៅពេលអនាគតនោះទេ បើសិនជាពួកយើងនៅតែព្យាយាមដោះស្រាយបញ្ហាដែលអាចដោះស្រាយគ្នាបាននៅលើតុ ជាមួយនឹងអាវុធ ជាមួយនឹងការបំផ្លិចបំផ្លាញ ជាមួយនឹងការបង្ហូរឈាម ជាមួយនឹងភាពវឹកវរ តាមរយៈការទម្លាក់គ្រាប់បែក ដោយមិនបែងចែករវាងជនស៊ីវិល និងទាហាន ។

លោក Erdogan បញ្ជាក់ថា អ៊ីស្រាអែលដែលបានវាយប្រហារអ៊ីរ៉ង់ដោយមានការគាំទ្រគ្មានដែនកំណត់ពីលោកខាងលិច ដោយបំផ្លិចបំផ្លាញតំបន់ហ្កាហ្សា និងគំរាមកំហែងរាល់ប្រទេសនៅក្នុងតំបន់នោះ ដឹងច្បាស់ពីអ្វីដែលពួកគេកំពុងធ្វើ ។ ពួកគេនឹងយល់ថាវាគឺជាកំហុសមួយនៅពេលអនាគត ប៉ុន្តែពួកយើងព្រួយបារម្ភខ្លាចថាដល់ពេលនោះ វានឹងយឺតពេលទៅហើយ ។ ពួកគេមិនត្រូវភ្លេចនោះទេថា គ្មានប្រទេសណាមួយនៅក្នុងភូមិសាស្ត្របុរាណមួយនេះ អាចកំណត់ព្រំដែនរបស់ខ្លួន និងរដ្ឋបាលរបស់ខ្លួនបាននោះឡើយ ។

សូមបញ្ចាក់ថា អ៊ីស្រាអែលបង្កសង្រ្គាមតាមអាកាសរបស់ខ្លួន ជាមួយនឹងការវាយប្រហារដ៏គួរភ្ញាក់ផ្អើលដែលបានសម្លាប់មេបញ្ជាការជាន់ខ្ពស់អ៊ីរ៉ង់ស្ទើរតែទាំងអស់ និងក្រុមអ្នកវិទ្យាសាស្រ្តនុយក្លេអ៊ែរ ។ ពួកគេនិយាយថា បច្ចុប្បន្ន ពួកគេបានគ្រប់គ្រងដែនអាកាសអ៊ីរ៉ង់ និងមានបំណងបង្កើនយុទ្ធនាការនៅក្នុងរយៈពេលប៉ុន្មានថ្ងៃទៀតនេះ ។

ស្របពេលនោះដែរ ក្រុមមន្រ្តីអ៊ីរ៉ង់ រាយការណ៍ពីចំនួនមនុស្សស្លាប់ ២២៤នាក់ ដែលភាគច្រើននៃពួកគេគឺជាជនស៊ីវិល ខណៈអ៊ីស្រាអែនិយាយថា មនុស្ស ២៤នាក់ត្រូវបានសម្លាប់ ៕