សេចក្ដីរាយការណ៍ពីសារព័ត៌មានរ៉យទ័របានឱ្យដឹងថា កងកម្លាំងសហរដ្ឋអាមេរិក បានដកខ្លួនចេញពីមូលដ្ឋានទ័ពចំនួន២ បន្ថែមទៀតនៅភាគឦសានប្រទេសស៊ីរី ដោយបង្កើនល្បឿននៃដំណើរការដកទាហាន ដែលធ្វើឱ្យមេបញ្ជាការកងកម្លាំងឃឺដស៊ីរីគាំទ្រដោយសហរដ្ឋអាមេរិក ព្រួយបារម្ភថា សកម្មភាពនេះអាចអនុញ្ញាតឱ្យមានការងើបឡើងវិញនៃក្រុមភេវករ រដ្ឋអ៊ីស្លាម។

អ្នកយកព័ត៌មានរ៉យទ័រ ដែលបានទៅកាន់មូលដ្ឋានទាំងពីរគឺ Al-Wazir និង Tel Baydar កាលពីសប្តាហ៍មុន បានរកឃើញថា ទីនោះភាគច្រើនទទេស្អាត ហើយមានការយាមកាមដោយក្រុមតូចៗនៃកងកម្លាំងប្រជាធិបតេយ្យស៊ីរី ឬ SDF — ជាក្រុមយោធាដឹកនាំដោយកងកម្លាំងឃឺដ ដែលទីក្រុងវ៉ាស៊ីនតោន បានគាំទ្រក្នុងការប្រយុទ្ធប្រឆាំងនឹងក្រុមរដ្ឋអ៊ីស្លាម អស់មួយទសវត្សរ៍មកហើយ។

កាមេរ៉ាដែលប្រើនៅលើមូលដ្ឋាន កាន់កាប់ដោយក្រុមចម្រុះយោធាដឹកនាំដោយអាមេរិកនោះ ត្រូវបានរុះរើ ហើយខ្សែបន្លាលួសហ៊ុមព័ទ្ធនៅតាមបរិវេណខាងក្រៅក៏ចាប់ផ្ដើមដកចេញ។ អ្នកនយោបាយឃឺដម្នាក់ ដែលរស់នៅមូលដ្ឋានមួយក្នុងចំណោមនោះ បាននិយាយថា លែងមានទាហានអាមេរិកនៅទីនោះទៀតហើយ។ ឆ្មាំ SDF នៅមូលដ្ឋានទីពីរនិយាយថា កងទ័ពបានចាកចេញនាពេលថ្មីៗនេះ ប៉ុន្តែបដិសេធមិនបញ្ជាក់ថានៅពេលណាទេ។ មន្ទីរបញ្ចកោណ ក៏បដិសេធមិនធ្វើអត្ថាធិប្បាយដែរ។

នេះជាការបញ្ជាក់ជាក់ស្ដែងលើកដំបូងដោយអ្នកសារព័ត៌មាន ដែលថាអាមេរិកបានដកខ្លួនចេញពីមូលដ្ឋានទ័ព Al-Wazir និង Tel Baydar ក្នុងខេត្ត Hasaka របស់ស៊ីរី។ សរុបមក មានមូលដ្ឋានយ៉ាងហោចណាស់ចំនួន៤ នៅក្នុងប្រទេសស៊ីរី ដែលទាហានអាមេរិក បានចាកចេញចាប់តាំងពីលោកប្រធានាធិបតី Donald Trump ចូលកាន់តំណែងអាណត្តិទីពីរកាលខែមករា៕