អភិបាលក្រុងទីក្រុង Los Angeles របស់សហរដ្ឋអាមេរិក លោកស្រី Karen Bass កាលពីថ្ងៃអង្គារ (១៧ មិថុនា) បានសម្រេចចិត្តដកបម្រាមគោចរពេលយប់ ដែលបានដាក់កាលពីសប្តាហ៍មុននៅក្នុងសង្កាត់ទីប្រជុំជននៃទីក្រុងធំទីពីររបស់ប្រទេស ដើម្បីលុបបំបាត់ការតវ៉ា ជុំវិញការឆ្មក់បង្រ្កាបអន្តោប្រវេសន៍សហព័ន្ធរបស់ទីភ្នាក់ងារ ICE។

ការដកបម្រាមគោចរ ដែលបានដាក់កាលថ្ងៃ១០ មិថុនា នេះគឺជាសញ្ញាចុងក្រោយបង្អស់ដែលបង្ហាញថា ការប៉ះទង្គិចគ្នារវាងក្រុមបាតុករ និងមន្ត្រី ដែលឡើងកម្ដៅខ្លាំងកាលពីសប្ដាហ៍មុននៅផ្នែកខ្លះនៃទីក្រុង Los Angeles ជាមួយនឹងឧស្ម័នបង្ហូរទឹកភ្នែក និងការដុតរថយន្ត ហាក់ដូចជាបានឈានដល់ទីបញ្ចប់ ហើយភាពតានតឹងបានធូរស្រាលមកវិញ។

ការប្រឈមមុខដាក់គ្នាលើកដំបូង បានមើលឃើញភ្នាក់ងារសហព័ន្ធប្រើគ្រាប់បែកផ្សែងដាក់លើហ្វូងបាតុករ ហើយក្រុមអ្នកតវ៉ាបានគប់ដុំថ្ម និងដបទៅលើមន្រ្តី និងរថយន្តនគរបាល។ ក្នុងប៉ុន្មានថ្ងៃថ្មីៗនេះ អារម្មណ៍នៅទីប្រជុំជនបានផ្លាស់ប្តូរមកជាធូរស្បើយបន្តិច។ វត្តមានយោធានៅតែមានជុំវិញអគារសហព័ន្ធ ប៉ុន្តែការប៉ះទង្គិចដ៏ខ្លាំងក្លារវាងនគរបាល និងបាតុករ គឺកម្រកើតមានណាស់។

ក្នុងសេចក្តីថ្លែងការណ៍មួយ លោកស្រី Bass បាននិយាយថា បម្រាមគោចររយៈពេល ៧ថ្ងៃនោះបានទទួលជោគជ័យ ហើយបានជួយការពារហាងអាជីវកម្ម ភោជនីយដ្ឋាន និងអ្នកស្រុក ពី "តួអង្គអាក្រក់ដែលមិនខ្វល់ពីសហគមន៍ជនអន្តោប្រវេសន៍"។ អភិបាលក្រុងរូបនេះសង្កត់ធ្ងន់ថា លោកស្រីនៅត្រៀមខ្លួនជាស្រេចដើម្បីចេញបម្រាមគោចរឡើងវិញ ប្រសិនបើស្ថានភាពតានតឹងនៅតែមិនរលត់បាត់៕