អស្ថិរភាពនយោបាយក្នុងប្រទេសថៃ និងវិបត្តិជម្លោះផ្ទៃក្នុងរវាងគណបក្សភឿថៃ (Pheu Thai) ដែលកំពុងកាន់អំណាច និងដៃគូចម្រុះរបស់ខ្លួនគឺគណបក្ស ភូមចៃថៃ (Bhumjaithai) ត្រូវបានគេរំពឹងថា នឹងធ្វើឱ្យទំនុកចិត្តវិនិយោគិនចុះខ្សោយកាន់តែខ្លាំងបន្ថែមទៀតលើប្រទេសនេះ ស្របពេលប្រឈមមុខនឹងការគំរាមកំហែងពន្ធ ៣៦% របស់សហរដ្ឋអាមេរិក លើការនាំចេញរបស់ខ្លួន។

លោក Poonyawat Sreesing សេដ្ឋវិទូជាន់ខ្ពស់នៅមជ្ឈមណ្ឌលស៊ើបការណ៍សេដ្ឋកិច្ចរបស់ធនាគារពាណិជ្ជ Siam Commercial Bank (SCB EIC) បានគូសបញ្ជាក់ថា សេដ្ឋកិច្ចថៃ បាននិងកំពុងស៊ូទ្រាំនឹងភាពមិនប្រាកដប្រជាផ្នែកនយោបាយមួយរយៈមកហើយ ហើយមិនអាចទប់ទល់បានទៀតចំពោះផលប៉ះពាល់ដ៏ធ្ងន់ធ្ងរនៃការរំលាយសភានោះទេ ខណៈកំពុងស្ថិតក្នុងជំហរមិនរឹងមាំស្រាប់។

អ្នកជំនាញមួយរូបទៀត គឺលោក Yunyong Thaicharoen ប្រធានសេដ្ឋវិទូ និងជាមន្ត្រីផ្នែកនិរន្តរភាពនៃធនាគារ SCB EIC លើកឡើងថា ការរុះរើគណៈរដ្ឋមន្ត្រីយ៉ាងឆាប់រហ័សដោយសារតែអស្ថិរភាពនយោបាយ និងភាពច្របូកច្របល់ក្នុងសង្គមថៃនាពេលបច្ចុប្បន្ននេះ គឺចាំបាច់ដើម្បីកាត់បន្ថយផលប៉ះពាល់សេដ្ឋកិច្ច។

នាយកគ្រប់គ្រងក្រុមហ៊ុនចែកចាយ SIS Distribution លោក Somchai Sittichaisrichart បានចង្អុលបង្ហាញថា អស្ថិរភាពនយោបាយប៉ះពាល់យ៉ាងអវិជ្ជមានដល់ស្ថានភាពសេដ្ឋកិច្ចដ៏ផុយស្រួយស្រាប់របស់ថៃ រួមទាំងបំណុលប្រជាជន ការនាំចេញទៅសហរដ្ឋអាមេរិក និងវិស័យទេសចរណ៍។ លោកព្រមានពីលទ្ធភាពនៃកំណើនផលិតផលក្នុងស្រុកសរុប GDP ស្ថិតក្នុងចំណុចសូន្យ ឬកំណើនអតិបរមា ១% ប៉ុណ្ណោះសម្រាប់ឆ្នាំ២០២៥ នេះ រួមជាមួយនឹងកង្វល់សន្តិសុខជាតិកាន់តែធ្ងន់ធ្ងរឡើង៕