នាយករដ្ឋមន្ត្រីអ៊ីស្រាអែល លោក Benjamin Netanyahu កាលពីថ្ងៃព្រហស្បតិ៍ (ទី១៩ ខែមិថុនា) បាននិយាយថា ការផ្លាស់ប្តូរ ឬការដួលរលំរបបរបស់អ៊ីរ៉ង់ មិនមែនជាគោលដៅនោះទេ ប៉ុន្តែអាចជាលទ្ធផលដែលសម្រេចបាន។

លោក Netanyahu បានប្រាប់ទូរទស្សន៍សាធារណៈអ៊ីស្រាអែល Kan ថា៖ «កិច្ចការនៃការផ្លាស់ប្តូររបប ឬការដួលរលំនៃរបបនេះ គឺជាកិច្ចការដំបូង និងសំខាន់បំផុត សម្រាប់ប្រជាជនអ៊ីរ៉ង់ផ្ទាល់។ គ្មានអ្វីជំនួសបានឡើយ។ នោះហើយជាមូលហេតុដែលខ្ញុំមិនបានបង្ហាញថា វាគឺជាគោលដៅ។ វាអាចជាលទ្ធផលដែលសម្រេចបាន ប៉ុន្តែវាមិនមែនជាគោលដៅច្បាស់លាស់ ឬផ្លូវការដែលយើងបានដាក់នោះឡើយ»។

ជាមួយគ្នានេះ លោក Netanyahu បានបញ្ជាក់ថា អ៊ីស្រាអែលកំពុង «ផ្លាស់ប្ដូរមុខមាត់របស់ពិភពលោក» នៅក្នុងសង្រ្គាមរបស់ខ្លួនជាមួយអ៊ីរ៉ង់ ដែលឥឡូវនេះចូលដល់ថ្ងៃទី៧ ហើយ។ លោកបានប្រាប់ថា៖ «ខ្ញុំបាននិយាយថា យើងកំពុងផ្លាស់ប្តូរមុខមាត់តំបន់មជ្ឈិមបូព៌ា ហើយឥឡូវនេះ ខ្ញុំនិយាយថា យើងកំពុងតែផ្លាស់ប្តូរមុខមាត់ពិភពលោក»។

លោកបានបន្ថែមថា អ៊ីស្រាអែលបានបំផ្លាញ «ជាងពាក់កណ្តាល» នៃជើងទម្របាញ់មីស៊ីលរបស់អ៊ីរ៉ង់។ ហើយមេដឹកនាំអ៊ីស្រាអែលបានប្រាប់ទៀតថា លោកស្វាគមន៍ «ជំនួយទាំងអស់» ដើម្បីជួយបំផ្លាញទីតាំងនុយក្លេអ៊ែររបស់អ៊ីរ៉ង់។

លោក Netanyahu បានសង្កត់ធ្ងន់ថា អ៊ីស្រាអែល «មានសមត្ថភាពវាយប្រហារកម្ទេចគ្រប់ទីតាំងនុយក្លេអ៊ែររបស់អ៊ីរ៉ង់» ប៉ុន្តែ «ជំនួយទាំងអស់ត្រូវបានស្វាគមន៍» ស្របពេលមានភាពស្រពេចស្រពិលថា តើទីក្រុងវ៉ាស៊ីនតោនអាចនឹងចូលរួមធ្វើសង្រ្គាមជាមួយអ៊ីស្រាអែលដែរ ឬទេ៕