មេបញ្ជាការយោធាជាន់ខ្ពស់របស់អ៊ុយក្រែន បាននិយាយថា ទាហានរុស្ស៊ីប្រហែលជា ១០.០០០នាក់ កំពុងប្រយុទ្ធនៅក្នុងតំបន់ Kursk របស់រុស្ស៊ី ក្នុងទំហំដីប្រហែល ៩០គីឡូម៉ែត្រក្រឡា ដែលគ្រប់គ្រងដោយអ៊ុយក្រែន។

លោក Oleksandr Syrskyi បាននិយាយដោយមិនបញ្ជាក់លម្អិត នៅក្នុងសុន្ទរកថាចេញផ្សាយដោយការិយាល័យរបស់លោកនៅថ្ងៃអាទិត្យ (២២ មិថុនា) ថា៖ "កងកម្លាំងអ៊ុយក្រែន គ្រប់គ្រងទឹកដីប្រហែល ៩០គីឡូម៉ែត្រក្រឡានៅស្រុក Hlushkov នៃតំបន់ Kursk របស់រុស្ស៊ី ហើយទាំងនេះគឺជាសកម្មភាពជាមុនក្នុងការឆ្លើយតបនឹងការវាយប្រហាររបស់សត្រូវដែលអាចកើតមាន"។

យោធាអ៊ុយក្រែននិយាយថា សកម្មភាពនៅក្នុងតំបន់នេះបានរារាំងរុស្ស៊ី ពីការបញ្ជូនកងកម្លាំងរបស់ខ្លួនមួយចំនួនធំទៅកាន់តំបន់ Donetsk ភាគខាងកើតអ៊ុយក្រែន ជាទីដែលមានការប្រយុទ្ធគ្នាខ្លាំងក្លាបំផុតមួយចំនួនបានកើតឡើង ក្នុងសង្រ្គាមអាយុកាលជាង ៣ឆ្នាំ។

ការមានប្រៀបរបស់រុស្ស៊ី បានកើនឡើងក្នុងខែឧសភា និងមិថុនា ប៉ុន្តែយោធាអ៊ុយក្រែននិយាយថា ផលចំណេញទាំងនោះបានមកដោយការចំណាយខ្ពស់នៃការស្លាប់ និងរបួសរបស់រុស្ស៊ី ក្នុងការវាយប្រហារជាក្រុមតូចៗ។ យោធាទីក្រុងគីវនិយាយថា កងទ័ពរបស់ខ្លួនបានវាយបកបិទផ្លូវរបស់រុស្ស៊ី ឆ្ពោះទៅកាន់តំបន់ Dnipropetrovsk ជាប់ព្រំដែនអ៊ុយក្រែន កាលពីសប្តាហ៍មុន ប៉ុន្តែទោះជាយ៉ាងនេះក្ដី សម្ពាធនៅតែបន្តកើតមាននៅក្នុងតំបន់ភាគខាងកើត និងភាគខាងជើងរបស់អ៊ុយក្រែន៕