រូបភាពពីផ្កាយរណបពាណិជ្ជកម្ម បានបង្ហាញថា ការវាយប្រហាររបស់សហរដ្ឋអាមេរិក លើរោងចក្រនុយក្លេអ៊ែរ Fordow របស់អ៊ីរ៉ង់ បានបង្កការខូចខាតយ៉ាងធ្ងន់ធ្ងរ និងអាចនឹងត្រូវបំផ្លាញចោលទាំងស្រុង លើទីតាំងកប់ក្រោមដីយ៉ាងជ្រៅ និងជាមជ្ឈមណ្ឌលផ្ទុកសារធាតុអ៊ុយរ៉ានីញ៉ូមដ៏ធំរបស់ទីក្រុងតេអេរ៉ង់ ប៉ុន្តែក្រុមអ្នកជំនាញ បានលើកពីការសង្ស័យកាលពីថ្ងៃអាទិត្យ (២២ មិថុនា) ថា ទំហំនៃការខូចខាតគឺមិនមានការបញ្ជាក់នោះទេ។

លោក David Albright អតីតអធិការកិច្ចនុយក្លេអែររបស់អង្គការសហប្រជាជាតិ ដែលជាប្រធានវិទ្យាស្ថានវិទ្យាសាស្ត្រ និងសន្តិសុខអន្តរជាតិ បានលើកឡើងថា "រោងចក្រទាំងនោះទើបតែរងការវាយប្រហារដោយគ្រាប់បែក MOP ហើយពេលនេះប្រហែលជាខូចខាតខ្លាំងណាស់" ដោយសំដៅទៅលើគ្រាប់បែកឃួងបំផ្ទុះគោលដៅក្រោមដីដ៏ធំ ដែលអាមេរិកបានទម្លាក់លើមូលដ្ឋានអ៊ីរ៉ង់មួយនេះ។

លោក Decker Eveleth អ្នកស្រាវជ្រាវជំនាញខាងរូបភាពផ្កាយរណបបានសង្កត់ធ្ងន់ថា ប៉ុន្តែការបញ្ជាក់ពីការបំផ្លិចបំផ្លាញនៅក្រោមដីទាំងនោះមិនអាចកំណត់បានទេ។ លោកបន្តថា សាល Fordow ដែលជីកនៅក្រោមភ្នំផ្ទុកទៅដោយម៉ាស៊ីនចម្រាញ់អ៊ុយរ៉ានីញ៉ូមរាប់រយគ្រឿងនេះគឺ "កប់ជ្រៅពេកហើយពិបាកវាយតម្លៃកម្រិតនៃការខូចខាតដោយគ្រាន់តែផ្អែកលើរូបភាពផ្កាយរណប"។

គួរឱ្យដឹងថា ដើម្បីការពារប្រឆាំងនឹងការវាយប្រហារណាមួយ ដូចជាសកម្មភាពយោធាដែលធ្វើឡើងដោយកងកម្លាំងសហរដ្ឋអាមេរិក កាលពីព្រឹកព្រលឹមថ្ងៃអាទិត្យនោះ អ៊ីរ៉ង់បានកប់កម្មវិធីនុយក្លេអ៊ែររបស់ខ្លួនជាច្រើនកន្លែងនៅក្នុងទីតាំងដែលមានកំពែងជ្រៅនៅក្រោមដី រួមទាំង Fordow ដែលស្ថិតនៅជ្រៅខ្លាំងក្នុងផ្នែកខាងក្រោមនៃភ្នំ។

អ្នកជំនាញជាច្រើនបានព្រមានថា អ៊ីរ៉ង់ទំនងជាផ្លាស់ប្ដូរឃ្លាំងផ្ទុកអ៊ុយរ៉ានីញ៉ូមដែលសម្បូរទៅដោយអាវុធកម្រិតខ្ពស់របស់ខ្លួនចេញពី Fordow មុនពេលមានការវាយប្រហារនៅព្រឹកថ្ងៃអាទិត្យ ហើយអាចលាក់សាធារធាតុដ៏គ្រោះថ្នាក់ទាំងនោះ និងសមាសធាតុនុយក្លេអ៊ែរផ្សេងទៀត នៅក្នុងទីតាំងផ្សេងដែលអ៊ីស្រាអែល អាមេរិក និងអ្នកត្រួតពិនិត្យនុយក្លេអ៊ែររបស់អង្គការសហប្រជាជាតិ មិនបានដឹង៕