នៅថ្ងៃចន្ទនេះ ជប៉ុនបានអំពាវនាវឲ្យបន្ធូរបន្ថយជម្លោះនៅអ៊ីរ៉ង់ និងនិយាយថា ការវាយប្រហាររបស់សហរដ្ឋអាមេរិក បានបង្ហាញការប្តេជ្ញាចិត្តរបស់ពួកគេរារាំងទីក្រុងតេអេរ៉ង់ ពីការទទួលបានអាវុធនុយក្លេអ៊ែរ ។

ថ្ងែងនៅក្នុងសន្និសីទសារព័ត៌មាននាពេលព្រឹក រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តីលោក Yoshimasa Hayashi បានបង្ហាញក្តីសង្ឃឹមយ៉ាងខ្លាំងក្លារបស់ជប៉ុនថា ផ្លូវសន្ទនានឹងត្រូវចាប់ផ្តើមឡើងវិញ តាមរយៈកិច្ចខិតខំការទូត ។

លោកនិយាយផងដែរថា វាពិតជាគួរឲ្យសោកស្តាយខ្លាំងណាស់ កាលដែលស្ថានភាពរវាងអ៊ីស្រាអែល និងអ៊ីរ៉ង់ កើនឡើងរហូតដល់មានការសងសឹកគ្នា ហើយជប៉ុនមានក្តីបារម្ភយ៉ាងខ្លាំងចំពោះការគំរាមរបស់អ៊ីរ៉ង់ ក្នុងការវាយប្រហារផលប្រយោជន៍របស់សហរដ្ឋអាមេរិក ។

កាលពីថ្ងៃអាទិត្យម្សិលមិញ អ៊ីរ៉ង់សន្យាការពារខ្លួន រយៈពេល ១ថ្ងៃក្រោយសហរដ្ឋអាមេរិកចូលរួមជាមួយអ៊ីស្រាអែល ក្នុងសកម្មភាពយោធាលោកខាងលិចធំបំផុតលើប្រទេសមួយនេះ ចាប់តាំងពីបដិវត្តន៍អ៊ិស្លាមឆ្នាំ ១៩៧៩ បើទោះបីជាមានការអំពាវនាវនៅទូទាំងពិភពលោក ឲ្យចៀសវាង និងងាកមករកតុចរចាតាមវិស័យការទូតក៏ដោយ ៕