ប្រធានអង្គការឃ្លាំមើលនុយក្លេអ៊ែររបស់អង្គការសហប្រជាជាតិបាននិយាយថា «ការខូចខាតយ៉ាងខ្លាំងត្រូវបានគេរំពឹងថានឹងកើតមាន» នៅឯរោងចក្រចម្រាញ់សារធាតុអ៊ុយរ៉ានីញ៉ូម Fordow របស់អ៊ីរ៉ង់ ក្នុងការវាយប្រហាររបស់សហរដ្ឋអាមេរិក។

អគ្គនាយកទីភ្នាក់ងារ IAEA លោក Rafael Grossi បាននិយាយនៅក្នុងកិច្ចប្រជុំកាលពីថ្ងៃចន្ទ ដែលត្រូវបានកោះប្រជុំក្នុងការឆ្លើយតបទៅនឹងការវាយប្រហារដោយសហរដ្ឋអាមេរិកលើទីតាំងនុយក្លេអ៊ែរអ៊ីរ៉ង់។ លោកបានបង្ហាញពីទិដ្ឋភាពនេះ ខណៈលោកនិយាយថា គ្មាននរណាម្នាក់ រួមទាំងអង្គការរបស់លោកផងដែរ ស្ថិតក្នុងស្ថានភាពនេះដើម្បីវាយតម្លៃបានពេញលេញពីការខូចខាតនៅក្រោមដី នៅរោងចក្រនេះឡើយ។

លោក Grossi បាននិយាយថា អ៊ីរ៉ង់បានជូនដំណឹងដល់ទីភ្នាក់ងារ IAEA ថា ពុំមានការកើនឡើងកម្រិតវិទ្យុសកម្មនៅក្រៅទីតាំង នៅតាមទីតាំងនុយក្លេអ៊ែរចំនួនបីកន្លែង ដែលត្រូវបានវាយប្រហារដោយកងកម្លាំងសហរដ្ឋអាមេរិក នោះទេ។

លោក Grossi បានសង្កត់ធ្ងន់ថា អ្វីដែលសំខាន់នោះគឺសារធាតុអ៊ុយរ៉ានីញ៉ូមចំនួន ៤០០ គីឡូក្រាម ដែលអ៊ីរ៉ង់ចម្រាញ់បានដល់ ៦០ ភាគរយ។ លោកបានអំពាវនាវឱ្យបញ្ឈប់អរិភាពដើម្បីអនុញ្ញាតឱ្យក្រុមអធិការកិច្ច IAEA ត្រឡប់ទៅទីតាំងនុយក្លេអ៊ែរអ៊ីរ៉ង់វិញ។