ហ្វូងមនុស្សដ៏ច្រើនជាពលរដ្ឋប៉ាឡេស្ទីន បានប្រមូលផ្តុំគ្នាកាលពីថ្ងៃចន្ទនៅជុំវិញរថយន្តដឹកជំនួយ ដើម្បីទទួលបានស្បៀងអាហារនៅក្រុង Beit Lahiya តំបន់ហ្កាហ្សា ក្នុងពេលមានការខូចខាតដល់អគារ និងហេដ្ឋារចនាសម្ព័ន្ធ និងកង្វះស្បៀងអាហារធ្ងន់ធ្ងរ។ គេបានមើលឃើញមនុស្សជាច្រើន ឡើងលើនិងនៅជុំវិញរថយន្តដឹកជំនួយ ខណៈអ្នកខ្លះទៀត ដើរឬឈរក្បែរទីតាំងនោះ។ អ្នករបួសជាច្រើននាក់ត្រូវបានដឹកចេញពីតំបន់នោះ ហើយគ្រួសារមួយចំនួន រួមមានទាំងកុមារ ត្រូវបានដឹកជញ្ជូនដោយប្រើប្រាស់រទេះអូសដោយសត្វ។

ក្រុមគ្រូពេទ្យក្នុងតំបន់ហ្កាហ្សានិយាយថា ក្នុងរយៈពេលប៉ុន្មានថ្ងៃកន្លងទៅនេះ ប្រជាជនប៉ាឡេស្ទីនរាប់សិបនាក់ត្រូវបានសម្លាប់ដោយការបាញ់ប្រហាររបស់អ៊ីស្រាអែល ខណៈពួកគេព្យាយាមយកអាហារពីរថយន្តដឹកជំនួយដែលត្រូវបាននាំចូលទៅក្នុងតំបន់ហ៊ុមព័ទ្ធមួយនេះដោយអង្គការសហប្រជាជាតិ និងទីភ្នាក់ងារសង្គ្រោះអន្តរជាតិ។ អ៊ីស្រាអែល បាននិងកំពុងបញ្ជូនជំនួយជាច្រើនដែលបច្ចុប្បន្ននេះអនុញ្ញាតឱ្យចូលទៅក្នុងហ្កាហ្សាតាមរយៈក្រុមថ្មីគាំទ្រដោយសហរដ្ឋអាមេរិក និងអ៊ីស្រាអែល គឺមូលនិធិមនុស្សធម៌តំបន់ហ្កាហ្សា ដែលធ្វើប្រតិបត្តិការនៅកន្លែងចែកចាយជំនួយនៅក្នុងតំបន់ការពារដោយកងកម្លាំងអ៊ីស្រាអែល។

អង្គភាពសេវាការទូតរបស់សហភាពអឺរ៉ុបបាននិយាយនៅក្នុងរបាយការណ៍ដែលមើលឃើញដោយ សារព័ត៌មានReuters ថា មានការចង្អុលបង្ហាញថា អ៊ីស្រាអែលបានរំលោភលើកាតព្វកិច្ចសិទ្ធិមនុស្សរបស់ខ្លួនក្រោមលក្ខខណ្ឌនៃកតិកាសញ្ញាដែលមានទំនាក់ទំនងរបស់ខ្លួនជាមួយប្លុកនេះ។ របាយការណ៍នេះនិយាយពីស្ថានភាពនៅតំបន់ហ្កាហ្សា ការគ្របដណ្តប់លើបញ្ហាទាក់ទងនឹងការបដិសេធជំនួយមនុស្សធម៌ ការវាយប្រហារលើមន្ទីរពេទ្យនិងទីតាំងវេជ្ជសាស្ត្រ ការភៀសខ្លួន និងការខ្វះការទទួលខុសត្រូវ។