ទីភ្នាក់ងារស្ទាបស្ទង់ភូគភ្ពសាស្ត្រសហរដ្ឋអាមេរិក (USGS) បាននិយាយថា គ្រោះរញ្ជួយដីកម្រិត ៦,៣រ៉ិចទ័រ បានវាយប្រហារភាគខាងត្បូងប្រទេសហ្វីលីពីន នៅថ្ងៃអង្គារ (២៤ មិថុនា) នេះ ប៉ុន្តែមិនមានការជូនដំណឹងអំពីរលកយក្សស៊ូណាមិឡើយ។ យោងតាម USGS បានឱ្យដឹងថា ការរញ្ជួយដីដ៏រាក់នោះ បានវាយប្រហារចម្ងាយប្រហែល ៣៧៤គីឡូម៉ែត្រភាគខាងកើតនៃកោះ Davao។

ពុំទាន់មានសេចក្តីរាយការណ៍ភ្លាមៗពីអ្នកស្លាប់ របួស ឬការខូចខាតនោះទេ។ វិទ្យាស្ថានតាមដានបន្ទុះភ្នំភ្លើង និងរញ្ជួយដីហ្វីលីពីន បានរាយការណ៍ពីរញ្ជួយដីក្នុងកម្រិត ៦,៤រ៉ិចទ័រ ហើយនិយាយថា មិនមានការប្រកាសអាសន្នរលកយក្សស៊ូណាមិ ត្រូវបានដាក់ចេញនោះទេ។

គួរឱ្យដឹងថា រញ្ជួយដីកើតឡើងស្ទើរតែរាល់ថ្ងៃទៅហើយនៅហ្វីលីពីន ដែលស្ថិតនៅលើ "តំបន់កងភ្លើង" មហាសមុទ្រប៉ាស៊ីហ្វិក ជាទីដែលមានសកម្មភាពរញ្ជួយខ្លាំងក្លា លាតសន្ធឹងពីជប៉ុន ឆ្លងកាត់អាស៊ីអាគ្នេយ៍ និងឆ្លងកាត់អាងប៉ាស៊ីហ្វិក។



កម្លាំងរញ្ជួយដីភាគច្រើនគឺខ្សោយខ្លាំងពេកដែលមនុស្សមិនអាចមានអារម្មណ៍ដឹងបាន ប៉ុន្តែរញ្ជួយដែលខ្លាំងក្លា និងបំផ្លិចបំផ្លាញ កើតឡើងដោយចៃដន្យ ហើយពុំមានបច្ចេកវិទ្យាជឿនលឿនណាមួយដែលអាចទាយទុកជាមុនបានទេ ថានៅពេលណា និងទីកន្លែងណាដែលរញ្ជួយដីធំៗអាចនឹងវាយប្រហារ៕