ប្រធានាធិបតីអ៊ុយក្រែន លោក Volodymyr Zelenskiy និងនាយករដ្ឋមន្ត្រីចក្រភពអង់គ្លេស លោក Keir Starmer បានប្រកាសពីគំនិតផ្តួចផ្តើមសហការផលិតផ្នែកការពារជាតិថ្មីមួយកាលពីថ្ងៃចន្ទ (២៣ មិថុនា) ក្នុងអំឡុងទស្សនកិច្ចរយៈពេលខ្លីរបស់លោក Zelenskiy ទៅកាន់ទីក្រុងឡុងដ្រ៍ ដើម្បីពិភាក្សាពីវិស័យការពាររបស់អ៊ុយក្រែន ប្រឆាំងនឹងរុស្ស៊ី។

លោក Starmer បាននិយាយថា៖ លោកពិតជាមានមោទនភាពណាស់ដែលភាគីទាំងពីរអាចប្រកាសកិច្ចព្រមព្រៀងសហការផលិតគ្រឿងយុទ្ធោបករណ៍ ដែលជាប្រភេទដំបូងបង្អស់រហូតមកដល់ពេលនេះរវាងអ៊ុយក្រែន និងអង់គ្លេស ហើយនឹងក្លាយជាជំហានដ៏ធំមួយឆ្ពោះទៅមុខ។ ថ្លែងជាមួយលោក Starmer លោក Zelenskiy បាននិយាយថា កិច្ចព្រមព្រៀងនេះនឹងជួយពង្រឹងប្រទេសទាំងពីរ ខណៈលោកបានថ្លែងអំណរគុណដល់ចក្រភពអង់គ្លេស សម្រាប់ការគាំទ្រក្នុងសង្គ្រាមប្រឆាំងនឹងរុស្ស៊ី។

ការិយាល័យរបស់លោក Starmer បាននិយាយក្នុងសេចក្តីថ្លែងការណ៍មួយថា កិច្ចព្រមព្រៀងចែករំលែកបច្ចេកវិទ្យាសមរភូមិនេះនឹងជំរុញការផលិតយានដ្រូនរបស់អ៊ុយក្រែន និងផ្សារភ្ជាប់ឧស្សាហកម្មការពារជាតិរបស់អង់គ្លេសជាមួយនឹងបច្ចេកវិទ្យាដែលកំពុងត្រូវបានបង្កើតឡើងនៅជួរមុខអ៊ុយក្រែន។

កិច្ចព្រមព្រៀងដែលគ្របដណ្តប់រយៈពេល ៣ឆ្នាំបន្ទាប់នោះ បានកើតមានឡើងក្រោយប្រទេសទាំងពីរបានកំណត់ភាពជាដៃគូរយៈពេល ១០០ឆ្នាំដើម្បីធ្វើឱ្យទំនាក់ទំនងសន្តិសុខ និងវប្បធម៌កាន់តែស៊ីជម្រៅ នៅពេលលោក Starmer ធ្វើទស្សនកិច្ចនៅទីក្រុងគីវ កាលពីខែមករា៕