អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គុយតឺរេស ( Antonio Guterres) កាលពីថ្ងៃចន្ទ បានថ្កោលទោសការវាយប្រហារភេរវកម្ម កាលពីថ្ងៃអាទិត្យ ទៅលើព្រះវិហារមួយកន្លែង ក្នុងទីក្រុងដាម៉ាស (Damascus) នៃប្រទេសស៊ីរី។

លោកអគ្គលេខាធិការ បានបញ្ជាក់ជាថ្មីថា អ្នកប្រព្រឹត្តអំពើភេរវកម្មទាំងអស់ ត្រូវទទួលខុសត្រូវ។ លោកបានកត់សម្គាល់ឃើញថា អាជ្ញាធរបណ្តោះអាសន្នស៊ីរី បានថ្កោលទោសការវាយប្រហារនេះ ហើយបន្ទាប់ពីការស៊ើបអង្កេតបឋម បានកំណត់ថា ការវាយប្រហារ ត្រូវបានធ្វើឡើងដោយក្រុមរដ្ឋឥស្លាម។ លោក Stephane Dujarric អ្នកនាំពាក្យ បាននិយាយនៅក្នុងសេចក្តីថ្លែងការណ៍មួយថា លោកអំពាវនាវឲ្យមានការស៊ើបអង្កេតពេញលើករណីនេះ។

លោក ហ្គុយតឺរេស ចូលរួមរំលែកទុក្ខយ៉ាងក្រៀមក្រំបំផុតទៅកាន់ក្រុមគ្រួសារជនរងគ្រោះ និងសូមជូនពរឲ្យអ្នករងរបួសឆាប់ជាសះស្បើយ។ សេចក្តីថ្លែងការណ៍ បានឲ្យដឹងថា លោកបញ្ជាក់ជាថ្មីនូវការប្តេជ្ញាចិត្តរបស់អង្គការសហប្រជាជាតិ ក្នុងការគាំទ្រប្រជាជនស៊ីរី ក្នុងការស្វែងរកសន្តិភាព សេចក្តីថ្លៃថ្នូរ និងយុត្តិ ធម៌។

ការវាយប្រហារអត្តឃាតក្នុងអំឡុងជួបជុំនៅល្ងាចថ្ងៃអាទិត្យ នៅវិហារ St. Elias Orthodox ក្នុងសង្កាត់ Christian Dweilaa នៃទីក្រុងដាម៉ាស បានសម្លាប់មនុស្សយ៉ាងហោចណាស់ ២២នាក់ និង ៦៣នាក់ផ្សេងទៀតបានរងរបួស។