សកម្មជនអាកាសធាតុរាប់សិបនាក់ មកពីចលនា Extinction Rebellion ត្រូវបានចាប់ខ្លួន ខណៈពួកគេព្យាយាមរារាំងផ្លូវមួយកន្លែងឆ្ពោះទៅកាន់ទីក្រុងឡាអេ ប្រទេសហូឡង់ ជាកន្លែងដែលកិច្ចប្រជុំកំពូលរបស់សម្ព័ន្ធយោធាណាតូចាប់ផ្តើមនៅថ្ងៃអង្គារ ទី២៤ មិថុនានេះ។ ខណៈនគរបាលរារាំងការតវ៉ាមិនអោយកើតឡើងនៅលើផ្លូវ A44 សកម្មជនជាច្រើននាក់បានផ្លាស់ប្តូរសកម្មភាពរបស់ពួកគេទៅកាន់វាលមួយកន្លែងនៅម្ខាងផ្លូវជិតតំបន់ Abbenes ប្រទេសហូឡង់។

អ្នកនាំពាក្យរបស់ក្រុមសកម្មជន លោក Emile Sprenger ដែលក្រោយមកត្រូវបានចាប់ខ្លួនរួមជាមួយសកម្មជនដទៃទៀតបាននិយាយថា «ជំនួសឱ្យការដាក់៥% ទៅក្នុងអង្គការណាតូ ពួកគេគួរតែវិនិយោគប្រាក់នេះទៅក្នុងគោលនយោបាយអាកាសធាតុដ៏ត្រឹមត្រូវ»។ លោក Sprenger បាននិយាយបន្ថែមថា លោកមានការព្រួយបារម្ភខ្លាំងអំពីប្រព័ន្ធអេកូឡូស៊ី និងអាកាសធាតុ «ដួលរលំ» ជាជាងការឈ្លានពានដែលអាចកើតមានពីប្រទេសរុស្ស៊ី។

គណៈប្រតិភូ និងមេដឹកនាំប្រហែល៦.០០០នាក់មកពី៣២ប្រទេស រួមមានទាំងប្រធានាធិបតីសហរដ្ឋអាមេរិក លោក Donald Trump ប្រធានាធិបតីបារាំងលោកEmmanuel Macron និងនាយករដ្ឋមន្ត្រីអង់គ្លេសលោកKeir Starmer នឹងចូលរួមព្រឹត្តិការណ៍ដែលធ្លាប់បិទបណ្តោះអាសន្ននៅវេទិកាពិភពលោកក្នុងទីក្រុងឡាអេ។ ក្នុងអំឡុងកិច្ចប្រជុំ មេដឹកនាំនឹងពិភាក្សាអំពីកិច្ចព្រមព្រៀងមួយស្តីពីការបង្កើនការចំណាយលើវិស័យការពារជាតិ ដែលទាមទារដដែលៗដោយសហរដ្ឋអាមេរិក។