ភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានថ្លែងថា កម្ពុជាបានលុបបំបាត់លើការធ្វើទារុណកម្ម សួរចម្លើយជនសង្ស័យ ឬអ្នកទោសនៅក្នុងពន្ធនាគារ ហើយពួកគេទទួលបានសិទ្ធិជាច្រើនផងដែរ ។

ក្នុងឱកាសអញ្ជើញសម្ពោធដាក់ឱ្យប្រើប្រាស់ផ្លូវការមណ្ឌលយុវនីតិសម្បទា ស្រុកកណ្តាលស្ទឹង ខេត្តកណ្តាលនៅថ្ងៃទី ២៨ ខែធ្នូ ឆ្នាំ២០២១ សម្តេចក្រឡាហោម បានមានប្រសាសន៍ថា មកដល់ពេលនេះកម្ពុជាបានបង្កើតគណៈកម្មធិការជាតិប្រឆាំងការធ្វើទារុណកម្ម (គ.ជ.ប.ទ) ស្របតាមគោលការណ៍របស់អង្គការសហប្រជាជាតិ (អ.ស.ប) ដូច្នេះពុំអាចចាប់ជនសង្ស័យ ធ្វើទារុណកម្មដើម្បីសួរចម្លើយនោះទេ ជនសង្ស័យត្រូវផ្តល់ចម្លើយដោយស័្មគ្រស្មោះ ហើយបើទោះបីជា គាត់មានទោសទណ្ឌត្រូវដាក់ក្នុងពន្ធនាគារក្តី ក៏ពុំត្រូវធ្វើទារុណកម្មគាត់នោះដែរ ។

សម្តេច បានសង្កត់ធ្ងន់ថា ទាំងអ្នកមិនទាន់កាត់ទោស និងអ្នកកាត់ទោសហើយក្តី គឺមិនអាចរំលោភបំពានទៅលើសិទ្ធិរបស់ពួកគេនោះទេ ។

សម្តេច ស ខេង បានបន្ថែមថា អ្នកទោសនៅក្នុងពន្ធនាគារ បើទោះបីជាត្រូវកាត់បន្ថយសិទ្ធិសេរីភាពយ៉ាងណាក្តី ប៉ុន្តែពួកគេនៅតែមានសិទ្ធិជាច្រើនទៀត ដូចជា សិទ្ធិក្នុងការទទួលបានអាហារហូបចុក សិទ្ធិហាត់ប្រាណថែទាំសុខភាព សិទ្ធិក្នុងការមានទំនាក់ទំនងជាមួយក្រុមគ្រួសារ ដឹងព័ត៌មាន និងសិទ្ធិទទួលបានការអប់រំដើម្បីកែប្រែខ្លួនជាដើម ៕អត្ថបទ ៖ សុខរិទ្ធ