ភ្នំពេញ ៖ សារមនី្ទរទួលស្លែង សម្ពោធបើកពិព័រណ៍មិនអចិន្ត្រៃយ៍ ស្តីពី ការចងចាំជនរងគ្រោះតាមរយៈសម្លៀកបំពាក់ ការអភិរក្សវាយនភណ្ឌនៅសារមនី្ទរទួលស្លែង នារសៀលថ្ងៃទី២៧ ខែធ្នូ ឆ្នាំ២០២១ ជាលទ្ធផលនៃកិច្ចសហការដ៏មានតម្លៃរវាងក្រសួងវប្បធម៌ និងស្ថានទូតសហរដ្ឋអាមេរិក ប្រចាំកម្ពុជា ក្នុងការចូលរួមថែរក្សា និងអភិរក្សសមុច្ច័យប្រវតិ្តសាស្រ្តឧក្រិដ្ឋកម្មនៅសារមនី្ទរទួលស្លែង សម្រាប់ការផ្សព្វផ្សាយឲ្យមនុស្សជំនាន់ក្រោយសិក្សារៀនសូត្រ និងចងចាំអំពីជនរងគ្រោះនៅមនី្ទរ ស-២១។

​បើតាមលោក ហង្ស និស្ស័យ ប្រធានការិយាល័យសារមនី្ទរទួលស្លែង បានឲ្យដឹងថា ជាលទ្ធផលក្រោមការសម្របសម្រួលរបស់ក្រសួងវប្បធម៌ និងវិចិត្រសិល្បៈ សារមនី្ទរទួលស្លែង បានទទួលជំនួយពីមូលនិធិឯកអគ្គរដ្ឋទូតសម្រាប់ការអភិរក្សវប្បធម៌ នៃក្រសួងការបរទេស សហរដ្ឋអាមេរិក សម្រាប់អនុវត្តគម្រោងអភិរក្សវាយនភណ្ឌសេសសល់ពីអតីតមនី្ទរ ស-២១ នៅសារមនី្ទរទួលស្លែង ចំនួន០២ដំណាក់កាល គឺដំណាក់កាលទី១៖ នៅឆ្នាំ២០១៨ និងដំណាក់កាលទី២ នៅឆ្នាំ២០២០។ សកម្មភាពការងារទាំងពីរដំណាក់កាលនេះ ផ្តោតទៅលើការរៀបចំវគ្គបណ្តុះបណ្តាលដល់មន្រី្ត និងបុគ្គលិកផ្នែកអភិរក្សរបស់សារមនី្ទរ ការអនុវត្តផ្ទាល់លើការងារអភិរក្ស និងកែសម្រួលការដាក់តាំងវាយនភណ្ឌក្នុងសាលពិព័រណ៍អចិន្ត្រៃយ៍អគារ «ខ»។

ជាមួយគ្នានោះដែរលោក Benjamin V.Wohlauer អនុប្រធានអគ្គរដ្ឋទូតសហរដ្ឋអាមេរិក ប្រចាំកម្ពុជា តំណាងដ៏ខ្ពង់ខ្ពស់របស់ឯកឧត្តម W. Patrick Murphy ឯកអគ្គរដ្ឋទូតអាមេរិកប្រចាំកម្ពុជា បានមានប្រសាសន៍ថា ស្ថានទូតអាមេរិក ប្រចាំកម្ពុជា មានការពេញចិត្ត នូវឱកាសដែលបានធ្វើការជាមួយសារមនី្ទរទួលស្លែង ទោះមានបញ្ហាប្រឈមសម័យកូវីដ-១៩ យ៉ាងណាកី្ត ដែលយើងបានតាំងចិត្តសម្រេចបាននាថ្ងៃនេះ។ ជាទូទៅសហរដ្ឋអាមេរិក មានកិច្ចសហប្រតិបតិ្តជាមួយប្រទេសកម្ពុជា ដើម្បីធ្វើការអភិរក្សវាយនភណ្ឌ មានច្រើន ដែលគម្រោងនាថ្ងៃនេះ បានបង្ហាញចំពោះមុខប្រវតិ្តសាស្រ្ត ជាការចងចាំទុករហូត ដោយធ្វើការរួមគ្នា ដើម្បីអភិរក្សនូវសម្លៀកបំពាក់ និងវាយនភណ្ឌ។

ទន្ទឹមគ្នានោះដែរ រដ្ឋលេខាធិការក្រសួងវប្បធម៌ និងវិចិត្រសិល្បៈ ឯកឧត្តម ប្រាក់ សុណ្ណារ៉ា បានថ្លែងថា ការរៀបចំសម្ពោធពិព័រណ៍មិនអចិន្រ្តៃយ៍ ជាផ្នែកមួយនៃការអនុវត្តគម្រោងអភិរក្សវាយនភណ្ឌ នៅសារមនី្ទរទួលស្លែង ដែលទទួលបានការគាំទ្រហិរញ្ញវត្ថុពីមូលនិធិឯកអគ្គរដ្ឋទូតសហរដ្ឋអាមេរិក សម្រាប់កិច្ចអភិរក្សបេតិកភណ្ឌ។ គម្រោងនេះ បានផ្តល់អត្ថប្រយោជន៍ដែលមិនអាចកាត់ថ្លៃ សម្រាប់កិច្ចការអភិរក្ស និងការកសាងសមត្ថភាពបុគ្គលិកសារមនី្ទរលើការងារអភិរក្ស។ ឯកឧត្តម រដ្ឋលេខាធិការ ក៏សូមឧទ្ទិសស្នាដៃពិព័រណ៍ និងការអភិរក្សសមុច្ច័យទាំងនេះ ជូនជនរងគ្រោះ ដែលបាត់បង់ជីវិតក្នុងសម័យខ្មែរក្រហម ជាពិសេសជនរងគ្រោះក្នុងមនី្ទរឃុំឃាំង ស-២១ ប្រមាណ២០,០០០នាក់ សូមព្រលឹងរបស់អ្នករាល់គ្នា បានទៅកាន់ទីស្ងប់សុខ៕​ អត្ថបទ ៖ រដ្ឋា