កាលពីថ្ងៃអង្គារ (ទី២៤ ខែមិថុនា) យោធាអ៊ីស្រាអែលបានប្រាប់ឲ្យដឹងថា ខ្លួនកំពុងបង្វែរការផ្តោតរបស់ខ្លួនទៅតំបន់ហ្កាហ្សាវិញ បន្ទាប់ពីបានឈានកិច្ចព្រមព្រៀងឈប់បាញ់ជាមួយអ៊ីរ៉ង់។

តែយ៉ាងណាក្ដី អំឡុងការវាយតម្លៃស្ថានភាព មេបញ្ជាការកងទ័ពជើងគោក លោក Eyal Zamir បាននិយាយថា៖ «យើងបានបញ្ចប់ដំណាក់កាលដ៏សំខាន់ហើយ ប៉ុន្តែយុទ្ធនាការប្រឆាំងនឹងអ៊ីរ៉ង់ មិនទាន់ចប់ទេសព្វគ្រប់នៅឡើយទេ»។

លោក Zamir បានអះអាងថា អ៊ីស្រាអែលបានធ្វើកម្មវិធីនុយក្លេអ៊ែររបស់អ៊ីរ៉ង់ដើរថយក្រោយរយៈពេលជាច្រើនឆ្នាំ។ ហើយលោកបញ្ជាក់បន្ថែមថា៖ «ឥឡូវនេះការផ្តោតជាចម្បងបានងាកទៅកាន់តំបន់ហ្កាហ្សាវិញហើយ ពោលគឺជាកាតព្វកិច្ចនាំយកចំណាប់ថ្នូរត្រលប់មកផ្ទះសម្បែងរបស់ពួកគេវិញ និងលុបបំបាត់របបក្រុមហាម៉ាស។ ខ្ញុំមានមោទនភាពដែលមានឯកសិទ្ធិបញ្ជាអង្គភាព ក្នុងកាលៈទេសៈនេះ»។

សូមបញ្ជាក់ថា បទឈប់បាញ់ដែលស្នើឡើងដោយសហរដ្ឋអាមេរិកបានចូលជាធរមានហើយ កាលពីព្រឹកថ្ងៃអង្គារ បន្ទាប់ពីមានការប្រយុទ្ធតាមអាកាសរយៈពេល ១២ថ្ងៃ រវាងអ៊ីស្រាអែល និងអ៊ីរ៉ង់ ដែលចាប់ផ្ដើមតាំងពីថ្ងៃទី១៣ ខែមិថុនាមក។

គួរដឹងដែរថា កងទ័ពអ៊ីស្រាអែលបានបើកការវាយលុកឥតប្រណីលើតំបន់ហ្កាហ្សា ចាប់តាំងពីខែតុលា ឆ្នាំ២០២៣ ដោយបានសម្លាប់ជនជាតិប៉ាឡេស្ទីនជាង ៥៦.០០០នាក់ ដែលភាគច្រើនជាស្ត្រី និងកុមារ។ តែអ៊ីស្រាអែលអះអាងថា ការវាយប្រហារនេះ មានគោលបំណងនាំយកមកវិញនូវចំណាប់ថ្នូរប្រហែល ៥០នាក់ដែលក្រុមហាម៉ាសឃុំខ្លួននៅក្នុងតំបន់ហ្កាហ្សា និងលុបបំបាត់ក្រុមតស៊ូប៉ាឡេស្ទីន៕