ប្រធានាធិបតីអ៊ុយក្រែន លោក Volodymyr Zelenskiy បាននិយាយកាលពីថ្ងៃពុធ (២៥ មិថុនា) នៅលើបណ្ដាញសង្គម X ដែលជាអតីត Twitter ថា រូបលោកបានជួបជាមួយប្រធានាធិបតីអាមេរិក លោក Donald Trump និងពិភាក្សាអំពីលទ្ធភាពនៃកិច្ចសហប្រតិបត្តិការការពារជាតិ ក្នុងអំឡុងពេលកិច្ចប្រជុំកំពូលរបស់អង្គការណាតូ រួមទាំងការផលិតរួមគ្នានៃយានដ្រូនជាមួយក្រុមហ៊ុនអាមេរិក និងការទិញប្រព័ន្ធការពារដែនអាកាសរបស់ទីក្រុងវ៉ាស៊ីនតោនបន្ថែមទៀត។

លោក Zelenskiy បានសរសេរថា "ភាគីទាំងពីរអាចពង្រឹងគ្នាទៅវិញទៅមក" ដោយសង្កត់ធ្ងន់លើតម្លៃយុទ្ធសាស្ត្រនៃទំនាក់ទំនងយោធាកាន់តែជិតស្និទ្ធ។ លោកបន្តថា រូបលោកបានពន្យល់ប្រាប់លោក Trump ពីការពិតបច្ចុប្បន្ននៃសង្រ្គាមនៅអ៊ុយក្រែន ដោយបន្ថែមថា "មេដឹកនាំរុស្ស៊ី លោក Vladimir Putin ពិតជាមិនឈ្នះនោះទេ"។

ជំនួបទល់មុខគ្នារវាងលោក Trump និងលោក Zelenskiy នេះគឺជាការសន្ទនាផ្ទាល់លើកដំបូងរបស់មេដឹកនាំទាំងពីរចាប់តាំងពីខែមេសាមក នៅពេលលោកទាំងពីរបានជួបមុខគ្នាយ៉ាងខ្លីនៅឯវិហារ St. Peter's ក្នុងអំឡុងពិធីបុណ្យព្រះសពរបស់សម្ដេចប៉ាប ហ្រ្វង់ស៊ីស ហើយក៏កើតឡើងបន្ទាប់ពីការប៉ះទង្គិចសម្ដីគ្នាយ៉ាងខ្លាំងនៅដើមឆ្នាំនេះនៅជំនួបក្នុងសេតវិមាន។

ក្នុងការបង្ហោះប្រព័ន្ធផ្សព្វផ្សាយសង្គម លោក Zelenskiy បានពណ៌នាកិច្ចពិភាក្សារបស់ភាគីទាំងពីរនៅទីក្រុងឡាអេ ប្រទេសហូឡង់ ថាប្រកបដោយផ្លែផ្កា និងអត្ថន័យ ហើយលោកបានសម្តែងការដឹងគុណចំពោះការបន្តគាំទ្ររបស់អាមេរិក។ បន្ទាប់ពីជួបជាមួយលោក Zelenskiy រួច លោក Trump បាននិយាយថា "ការបង្កើនភាពទទួលខុសត្រូវបន្ថែមទៀតសម្រាប់សន្តិសុខអឺរ៉ុប នឹងជួយទប់ស្កាត់គ្រោះមហន្តរាយនាពេលអនាគត ដូចជាស្ថានភាពដ៏អាក្រក់ជាមួយរុស្ស៊ី និងអ៊ុយក្រែនបច្ចុប្បន្ននេះ"៕