មន្ទីរបញ្ចកោណ នឹងបង្កើតតំបន់យោធាថ្មីចំនួនពីរ នៅតាមបណ្តោយព្រំដែន ជាមួយប្រទេសម៉ិកស៊ិក ជាវិធានការដែលអនុញ្ញាតឲ្យកងទ័ពឃុំខ្លួនបណ្តោះអាសន្ននូវជនអន្តោប្រវេសន៍ ឬអ្នកបំពាន។

រដ្ឋបាលរបស់លោកប្រធានាធិបតី ដូណាល់ ត្រាំ ( Donald Trump) បានសាទរចំពោះសកម្មភាពរបស់ខ្លួននៅតាមព្រំដែន រួមទាំងការដាក់ពង្រាយទាហានសកម្ម ដែលជាហេតុផលសម្រាប់ការធ្លាក់ចុះយ៉ាងខ្លាំងនៃការឆ្លងកាត់ដោយជនអន្តោប្រវេសន៍ដែលគ្មានឯកសារ។ លោក ត្រាំ បានធ្វើឲ្យការព្រួយបារម្ភរបស់អ្នកបោះឆ្នោតអំពីអន្តោប្រវេសន៍ ក្លាយជាមូលដ្ឋានគ្រឹះនៃកិច្ចប្រឹងប្រែងបោះឆ្នោតឡើងវិញ នៅឆ្នាំ ២០២៤ របស់លោក។

មន្ត្រីអាមេរិកម្នាក់ បាននិយាយថា មន្ទីរបញ្ចកោណបានបង្កើតតំបន់យោធាចំនួនពីររួចហើយ ប៉ុន្តែមានតែមនុស្ស ៤នាក់ប៉ុណ្ណោះ ដែលត្រូវបានឃុំខ្លួនបណ្តោះអាសន្ន។

«តំបន់ការពារជាតិ»ថ្មីមួយ នឹងត្រូវបានបង្កើតឡើង ដោយមានប្រវែងប្រហែល ២៥០ ម៉ាយ (៤០២គីឡូម៉ែត្រ) នៃទន្លេ Rio Grande ក្នុងរដ្ឋតិចសាស់ និងត្រូវបានគ្រប់គ្រងជាផ្នែកមួយនៃមូលដ្ឋានរួម San Antonio។ នេះបើយោងតាមកងទ័ពអាកាស។

មន្ត្រីអាមេរិក បាននិយាយថា តំបន់យោធាផ្សេងទៀត នឹងត្រូវបានគ្រប់គ្រងជាផ្នែកមួយនៃស្ថានីយអាកាស របស់កងទ័ពជើងទឹកក្នុងទីក្រុង Yuma នៃរដ្ឋ Arizona ។

តំបន់ទាំងនេះ មានគោលបំណងអនុញ្ញាតឲ្យរដ្ឋបាលរបស់លោក ត្រាំ ប្រើប្រាស់កងទ័ព ដើម្បីឃុំខ្លួនជនអន្តោប្រវេសន៍ ដោយមិនចាំបាច់ប្រើប្រាស់ច្បាប់ស្តីពីការបះបោរឆ្នាំ ១៨០៧ ដែលផ្តល់អំណាចដល់ប្រធានាធិបតី ក្នុងការដាក់ពង្រាយយោធាអាមេរិក ដើម្បីបង្ក្រាបព្រឹត្តិការណ៍នានា ដូចជាភាពចលាចល   ស៊ីវិលជាដើម។