ភ្នំពេញ៖ ឯកឧត្តមបណ្ឌិត សៅ ជីវ័ន្ត រដ្ឋលេខាធិការ តំណាងឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ នៅថ្ងៃទី២៦ ខែមិថុនា ឆ្នាំ២០២៥នេះ បានដឹកនាំគណៈកម្មាធិការអន្តរក្រសួង រួមមានក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ និងមន្រ្តីពាក់ព័ន្ធ ចុះត្រួតពិនិត្យ វាយតម្លៃលើការងារស្ថាបនាផ្លូវបេតុង ផ្លូវក្រាលដីល្បាយគ្រួស និងការសាងសង់លូប្រអប់មុខចំនួន១កន្លែង នៅខេត្តព្រៃវែង ខេត្តកំពង់ចាម និងខេត្តកណ្តាល ។

គម្រោងទាំង៣នេះរួមមាន ទី១៖ ការងារសាងសង់លូប្រអប់ នៅភូមិស្វាយ និងភូមិព្រៃក្រឡាញ់តូច ឃុំព្រៃស្រឡិត ស្រុកពារាំង ខេត្តព្រៃវែង, ទី២. ការងារស្តារឡើងវិញផ្លូវក្រាលដីល្បាយក្រួសចំនួន ១ខ្សែ ប្រវែង ៨,៣០០ម៉ែត្រ និងលូប្រអប់ ចាប់ពីភូមិតារៀម ភូមិអូរពពេល ទៅភូមិស្វាយផ្អែម ឃុំដងក្តារ ស្រុកស្ទឹងត្រង់ ខេត្តកំពង់ចាម និងទី៣. ការងារស្ថាបនាផ្លូវក្រាលបេតុងចំនួន ១០ខ្សែ និងប្រព័ន្ធលូនៅភូមិស្វាយជ្រុំ ភូមិឡឥដ្ឋ និងភូមិវត្តចាស់ ឃុំព្រែកដំបង ស្រុកមុខកំពូល ខេត្តកណ្តាល ។ អនុវត្តដោយនាយកដ្ឋានវិស្វកម្ម ក្រសួងការពារជាតិ ប្រើប្រាស់ថវិកាជំពូក២១ ដែលដឹកនាំដោយឧត្តមសេនីយ៍ទោ សោម សុដេត នាយករង នាយកដ្ឋានវិស្វកម្ម ។

ឯកឧត្តមបណ្ឌិត សៅ ជីវ័ន្ត បានមានប្រសាសន៍ថា ក្រសួងអភិវឌ្ឍន៍ជនបទ ក្នុងនាមជាសេនាធិការផ្ទាល់ របស់រាជរដ្ឋាភិបាលកម្ពុជា បាននឹងកំពុងជំរុញការងារសាងសង់ ស្ដារឡើងវិញ កែលម្អ ពង្រីក ថែទាំ និងជួសជុលផ្លូវជនបទ ក្រាលកៅស៊ូពីរជាន់ ឬបេតុង ដើម្បីបង្កភាពងាយស្រួល ក្នុងការធ្វើដំណើររបស់ពលរដ្ឋ កាត់បន្ថយពេលវេលា និងកាត់បន្ថយចំណាយលើការដឹកជញ្ជូនកសិផល និងទំនិញផ្សេងៗនៅជនបទ។

ឯកឧត្តមបានបន្តថា បញ្ហានេះ ក្រសួងបាននឹងកំពុងយកចិត្តទុកដាក់ខ្ពស់ លើការពង្រឹងសមត្ថភាពជំនាញក្នុងគោលដៅបង្កើនគុណភាព និងធានាចីរភាពផ្លូវជនបទ ព្រោះជនបទមានសារៈសំខាន់ ក្នុងការជំរុញដំណើរអន្តរកម្មផ្នែកសេដ្ឋកិច្ច និងសង្គមកិច្ចនៅជនបទ ជាពិសេសការកាត់បន្ថយគម្លាតតំបន់ជនបទ និងទីក្រុង ។ ជាក់ស្តែងជុំវិញផ្លូវជនបទនេះ ក្រសួងអភិវឌ្ឍន៍ជនបទកំពុងប្រែក្លាយ ផ្លូវក្រាលក្រួសជាច្រើនខ្សែ ទៅជាផ្លូវក្រាលកៅស៊ូ ផ្លូវបេតុង សំដៅធានាបានការប្រើប្រាស់យូរអង្វែង ដើម្បីជំរុញដំណើរអន្តរកម្ម ផ្នែកសង្គម-សេដ្ឋកិច្ច និងការផ្សារភ្ជាប់សកម្មភាពធុរកិច្ចផ្សេងៗ រវាងតំបន់ជនបទ និងទីប្រជុំជន ។

ឆ្លៀតក្នុងឱកាសនោះដែរ ឯកឧត្តមបណ្ឌិត សៅ ជីវ័ន្ត ក៏បានអំពាវនាវដល់អាជ្ញាធរមូលដ្ឋាន និងប្រជាពលរដ្ឋដែលរស់នៅតាមបណ្តាដងផ្លូវ សូមចូលរួមជួយថែទាំផ្លូវ និងសូមកុំដឹកជញ្ជូនលើសទម្ងន់ និងសូមកុំបោះចោលសំរាមនៅតាមមាត់លូ ដែលជាមូលហេតុនាំឱ្យស្ទះលូនៅរដូវវស្សា ដែលជាមូលហេតុមួយនាំឱ្យផ្លូវឆាប់ខូចជាដើម ។

ជាមួយនោះ គណៈកម្មការអន្តរក្រសួង ក៏បានស្តាប់នូវសំណូមពរ របស់ពលរដ្ឋ ក្នុងការស្នើសុំបន្តអភិវឌ្ឍន៍បន្ថែម នូវហេដ្ឋារចនាសម្ព័ន្ធផ្លូវ ស្ពាន និងការដាក់លូ ដើម្បីផ្តល់ភាពងាយស្រួលដល់ពួកគាត់អាចដឹកជញ្ជូនកសិផល និងធ្វើដំណើរជាដើម ៕ អត្ថបទ បាន សុខរិទ្ធិ