ប្រព័ន្ធផ្សព្វផ្សាយអ៊ីស្រាអែលជាច្រើនបានរាយការណ៍នៅថ្ងៃព្រហស្បតិ៍ (២៦ មិថុនា) សប្ដាហ៍នេះថា ប្រធានាធិបតីអាមេរិក លោក Donald Trump កំពុងតែជំរុញឱ្យលោកនាយករដ្ឋមន្រ្តីអ៊ីស្រាអែល Benjamin Netanyahu បញ្ចប់ជម្លោះអាយុកាល ២០ខែនៅក្នុងដែនដីហ្កាហ្សា ប្រឆាំងនឹងក្រុមហាម៉ាស ក្នុងស្ថានការណ៍វិវឌ្ឍដ៏ធំមួយបន្ទាប់ពីជោគជ័យក្នុងសង្រ្គាមរយៈពេល ១២ថ្ងៃទល់នឹងអ៊ីរ៉ង់។

កាសែតអ៊ីស្រាអែល Hayom បានរាយការណ៍ដោយសម្អាងដល់ប្រភពមិនបញ្ចេញឈ្មោះថា លោក Netanyahu និងលោក Trump បានឯកភាពគ្នានៅក្នុងកិច្ចសន្ទនាតាមទូរសព្ទក្នុងសប្ដាហ៍នេះថានឹងមានការបញ្ចប់សង្រ្គាមហ្កាហ្សាយ៉ាងលឿនបំផុត ប្រហែលជាក្នុងរយៈពេល ២សប្ដាហ៍។

ប្រព័ន្ធផ្សព្វផ្សាយរដ្ឋ Kan រាយការណ៍ថា ការទាមទាររបស់លោក Trump ឱ្យលុបចោលការកាត់ក្តីព្រហ្មទណ្ឌប្រឆាំងលោក Netanyahu ក៏ផ្សារភ្ជាប់នឹងកិច្ចប្រឹងប្រែងនេះដែរ។ របាយការណ៍បន្តថា មន្ត្រីជាន់ខ្ពស់អ៊ីស្រាអែល ដែលសុំមិនបញ្ចេញឈ្មោះនោះនិយាយថា សារបង្ហោះតាមបណ្ដាញសង្គម Truth Social របស់លោក Trump ដែលទាមទារឱ្យឈប់បង្ខំលោក Netanyahu ចូលរួមសវនាការលើបទចោទព្រហ្មទណ្ឌជាច្រើន "មិនមែនធ្វើឡើងដោយគ្មានហេតុផល" នោះទេ។

ក្រោយមក លោក Netanyahu បាននិយាយនៅថ្ងៃព្រហស្បតិ៍ដដែលនោះថា លទ្ធផលនៃសង្រ្គាមរបស់អ៊ីស្រាអែល ជាមួយអ៊ីរ៉ង់ បានបើកឱកាសសម្រាប់សន្តិភាពដែលប្រទេសរបស់លោកមិនគួរខ្ជះខ្ជាយឡើយ។ បទឈប់បាញ់អ៊ីស្រាអែល-អ៊ីរ៉ង់ ដែលសម្របសម្រួលដោយអាមេរិក បានបង្កើនក្ដីសង្ឈឹមក្នុងចំណោមប្រជាជនប៉ាឡេស្ទីន សម្រាប់ការបញ្ចប់សង្រ្គាមហ្កាហ្សា ដ៏បំផ្លិចបំផ្លាញ៕