មេបញ្ជាការយោធាជាន់ខ្ពស់របស់អ៊ុយក្រែន បាននិយាយកាលពីថ្ងៃព្រហស្បតិ៍ថា កងកម្លាំងអ៊ុយក្រែន បានបញ្ឈប់ការរុលទៅមុខនាពេលថ្មីៗនេះរបស់រុស្ស៊ី ចូលទៅក្នុងតំបន់ Sumy ភាគខាងជើង និងបានធ្វើឲ្យមានស្ថិរភាពជួរមុខ នៅជិតព្រំដែនជាមួយប្រទេសរុស្ស៊ី។

លោកឧត្តមសេនីយ៍ឯក Oleksandr Syrskyi មេបញ្ជាការកងកំលាំងប្រដាប់អាវុធអ៊ុយក្រែន បាននិយាយថា ជោគជ័យរបស់អ៊ុយក្រែននៅតំបន់ Sumy បានរារាំងរុស្ស៊ីពីការដាក់ពង្រាយទាហានរុស្ស៊ីប្រហែល ៥00.000 នាក់ រួមទាំងកងពលតូចទ័ពអាកាស និងកងម៉ារីន ទៅកាន់តំបន់ផ្សេងទៀតនៃជួរមុខ។

ការអះអាងរបស់លោក មិនអាចត្រូវបានផ្ទៀងផ្ទាត់ដោយឯករាជ្យទេ ហើយមន្ត្រីរុស្ស៊ីក៏មិនធ្វើការអត្ថាធិប្បាយភ្លាមៗដែរ។

កងកម្លាំងរុស្ស៊ី បាននិងកំពុងវាយលុកទៅមុខបន្តិចម្តងៗ នៅចំណុចមួយចំនួននៅលើខ្សែត្រៀមជួរមុខប្រហែល ១.000គីឡូម៉ែត្រ (៦២០ ម៉ាយ) ទោះបីជាការមានចំណាយច្រើន ទាក់ទងនឹងការស្លាប់និងរបួសរបស់ទាហាន និងគ្រឿងយុទ្ធោបករណ៍ដែលខូចក៏ដោយ។ កងទ័ពអ៊ុយក្រែនដែលមានចំនួនច្រើនជាងនេះ បានពឹងផ្អែកយ៉ាងខ្លាំងលើយានដ្រូន ដើម្បីវាយប្រហារលើជនជាតិរុស្ស៊ីឲ្យដកថយ។

កិច្ចខិតខំប្រឹងប្រែងអន្តរជាតិដឹកនាំដោយសហរដ្ឋអាមេរិកអស់រយៈពេលជាច្រើនខែ ដើម្បីបញ្ឈប់សង្រ្គាមជាងបីឆ្នាំ បានបរាជ័យ។ ចំពេលមានអរិភាពទាំងនេះ ភាគីទាំងពីរបានបន្តដោះដូរអ្នកទោសសង្គ្រាម ដែលបានព្រមព្រៀងគ្នា ក្នុងអំឡុងកិច្ចចរចានាពេលថ្មីៗនេះ រវាងគណៈប្រតិភូរបស់ពួកគេ នៅទីក្រុងអ៊ីស្តង់ប៊ុលនៃ ប្រទេសទួរគី។