ព្រះវិហារ៖ ផ្លែដូងក្រអូបចំនួន១៥០០គីឡូក្រាម ក្រោយស្រាវជ្រាវរកឃើញថា ឈ្មួញលួចនាំចេញពីថៃ ឆ្លងកាត់ប្រទេសឡាវ ចូលមកកម្ពុជា តាមច្រកកំពង់ស្រឡៅ ស្រុក​ឆែប ខេត្តព្រះវិហារ ត្រូវបានបង្ក្រាបយកទៅដុតកម្ទេចចោលផងដែរ ។

បើតាមអាជ្ញាធរស្រុកឆែប បានឱ្យដឹងថា ក្រោយទទួលបានការណែនាំពីឯកឧត្ដម​ គីម​ រិទ្ធី​ អភិបាលខេត្ត​ព្រះវិហារ បានបញ្ជា​លោក​ ឃិត​ សុធារ៉ា​ អភិបាលស្រុកឆែប ដឹកនាំកំលាំង​គណៈបញ្ជាការរដ្ឋបាលស្រុកឆែប​​ រួមទាំងក្រុមមន្ត្រីគយនៃការិយាល័យស្រាវជ្រាវ និងបង្ក្រាបអំពើរត់ពន្ធតំបន់៥ សហការជាមួយមន្ត្រីគយសាខាគយ និងរដ្ឋាករខេត្តកំពង់ធំ សហការជាមួយកងកម្លាំងរាជអាវុធហត្ថលើផ្ទៃប្រទេស បានធ្វើការឃាត់រថយន្តសាំយ៉ុងដឹកផ្លែឈើមួយគ្រឿង ពាក់ស្លាកលេខក្រុងព្រះសីហនុ 2A-2243 មួយគ្រឿង កាលពីថ្ងៃទី២៥ ខែមិថុនា ឆ្នាំ២០២៥ កន្លងមក ។ជាលទ្ធផលសមត្ថកិច្ចចម្រុះរកឃើញ៖ ផ្លែដូងក្រអូបចំនួន ២៨៥០ ផ្លែស្នើនឹង ១៥០០គីឡូក្រាម , ទឹកដូងច្រកដាក់ដបចំនួន ២៨០ដប ស្មើនឹង ៤២០លីត្រ ,សាច់ដូង ២៤គីឡូក្រាម ។

មន្ត្រីគយបានសាកសួរ និងស្រាវជ្រាវរកឃើញថា ដូងក្រអូបទាំងអស់នេះ​ គឺបានលួចនាំចេញពីប្រទេសថៃ ឆ្លងកាត់ប្រទេសឡាវ រួចបន្តនាំចូលតាមទូកឆ្លងកាត់កំពង់ចម្លង ឃុំកំពង់ស្រឡៅស្រុក​ឆែប ជាប្រភេទ​ទំនិញដែល​រាជរដ្ឋាភិបាល​កម្ពុជា​ហាមឃាត់។ នៅព្រឹក​ថ្ងៃ​ទី២៧​ ខែមិថុនា​ ឆ្នាំ២០២៥​ លោក​ ជាប សៅ​ ប្រធានសាខាគយ​ និងរដ្ឋករខេត្តកំពង់ធំ​ ព្រះវិហារ​ បានចាត់ក្រោមឱវាទ​ យកទំនិញទាំងនោះ ទៅធ្វើការដុតបំផ្លាញចោល​ នៅក្នុងបរិវេណសាលាស្រុកឆែប។

សូមបញ្ជាក់ថា​ ការដុតបំផ្លាញចោលនេះ​ មានការចូលរួម​ មានការចូលរួមពី​ លោក​ អភិបាលស្រុក​ កំលាំងអធិការដ្ឋាននគរបាលស្រុក​ កំលាំង​កងរាជអាវុធហត្ថខេត្ត​ និងមន្ត្រី​គយ​ និងអ្នកបើកបរ​ ឡានដឹកដូងក្រអូបនេះផងដែរ៕